Túrkistan oblysynda qyryqqabat pisti
TÚRKІSTAN. KAZINFORM — Jetisaılyq dıqandar qyryqqabattyń alǵashqy ónimin eksporttaýdy bastady.
Jetisaı aýdanyna qarasty J.Eralıev aýyldyq okrýgindegi «Orynbaı ata» sharýa qojalyǵy qyryqqabattyń alǵashqy ónimderin Reseı eline eksporttap jatyr. Sharýa 1 gektar aýmaqqa qyryqqabattyń erte pisetin «magnýs» sortyn ekken bolatyn.
Qazir egistik basynda oramjapyraqtyń ár kelisi 250 teńgeden saýdalanyp jatyr. Jaqyn arada 2 gektar alqapqa egilgen «zarısma» tuqymy da ónim beretin bolady. Odan bólek, sharýa taǵy 6 gektarǵa qaýynnyń «aeroport» sortyn ósirmek nıette.
— 45-50 kúnde pisetin kókónis búgin alǵashqy ónimdi berip jatyr. 1 gektarǵa egilgen 32 myń túp kóshetten mol ónim alýdamyz. Bul ketken shyǵyndarymyz ben tókken terimizdiń tolyqtaı aqtalǵanyn bildiredi. Qyryqqabatty Reseı federatsııasynyń Perm qalasyna satýǵa jiberýdemiz, — dedi «Orynbaı ata» sharýa qojalyǵynyń tóraǵasy Nurlybek Jaıynbaev.
Jetisaı aýdandyq aýyl sharýashylyǵy jáne jer qatynastar bóliminiń málimetinshe, óńirde bıyl 1158 gektar aýmaqqa erte pisetin qyryqqabat egilgen. Boljam boıynsha 50 myń tonnaǵa jýyq ónim alý josparlanyp otyr. «Zarısma», «Valıkor», «Magnýs», «Rında», «Zakaz» syndy qyryqqabat sorttary egilgen alqaptyń 893 gektaryna sý únemdeý tehnologııasy engizilgen. Ótken jyly aýdan dıqandary 1287 gektar jerge qyryqqabat daqylyn egip, gektarynan orta eseppen 30 tsentnerden ónimin óndirdi. Negizinen erte pisetin qyryqqabattyń basym bóligi Reseı, Belarýs jáne Eýropa elderine eksporttalady.
Aıta keteıik, budan buryn Túrkistan oblysynda 896 myń gektarǵa aýyl sharýashylyǵy daqyldary egilgenin jazǵan bolatynbyz.