Túrkistan oblysynda kelisimshartsyz sý paıdalanýdyń 793 faktisi anyqtaldy
TÚRKІSTAN. KAZINFORM — Túrkistan oblysynda sý paıdalaný kezinde zań talaptarynyń buzylǵany belgili boldy.
Bıyl Túrkistan oblysy boıynsha 4,7 mlrd tekshe metr sý lımıti belgilengen. Onyń ishinde turaqty sýarýǵa 3,8 mlrd tekshe metr sý bólingen. Vegetatsııalyq kezeńde Syrdarııa basseıni boıynsha 2,5 mlrd tekshe metr sý paıdalanylǵan.
Aral-Syrdarııa basseındik ınspektsııasy basshysynyń orynbasary mindetin atqarýshy Aqtóre Túımebektiń aıtýynsha, ınspektsııa mamandary sý zańnamasynyń saqtalýyn baqylaý baǵytynda keshendi jumystar júrgizip jatyr.
Onyń sózinshe, bıyl quqyq qorǵaý organdarymen jumys toby qurylyp, Shardara sý qoımasy, Syrdarııa, Arys jáne Keltemashat ózenderiniń boıynda reıdtik is-sharalar ótkizilgen.
— Reıdtik is-sharalar nátıjesinde 35 tulǵaǵa jalpy somasy 5,4 mln teńge ákimshilik aıyppul salyndy. Sonymen qatar, «Qazsýshar» RMK-men birlesip Shardara, Jetisaı jáne Maqtaaral aýdandarynda kelisimshartsyz sý paıdalanýdyń 793 faktisi anyqtaldy. Atalǵan faktiler boıynsha keltirilgen 122,7 mln teńge zalaldy óndirip alý jónindegi talap qoıý aryzdary sotqa joldandy, — dedi Aqtóre Túımebek.
Sondaı-aq oblystyń bes aýdanyndaǵy aýyz sýmen qamtamasyz etetin kásiporyndarǵa júrgizilgen tekserý barysynda Sý kodeksi talaptaryn buzýdyń 114 faktisi anyqtaldy. Nátıjesinde 40 mln teńge kóleminde ákimshilik aıyppul salyndy. Qazirgi ýaqytta baqylaý jumystary oblystyń ózge aýdandarynda jalǵasyp jatyr.
Budan bólek, Shaıan, Arys jáne Yrmaq ózenderiniń boıynda, sondaı-aq Saýran aýdanynda zańsyz balyq toǵandaryn salý jáne paıdalaný boıynsha jeti fakti anyqtaldy. Osy quqyq buzýshylyqtar boıynsha 2,5 mln teńge ákimshilik aıyppul salyndy. Sonymen qatar, eki nysandy buzý týraly sot sheshimi shyǵaryldy.
Buǵan deıin sý lımıtin buzǵan qyzylordalyq sharýalarǵa 17 mln teńge aıyppul salynǵanyn habarlaǵan edik.
