Túrkistan oblysynda kedendik tekserýden keıin 250 mln teńge qosymsha tólem esepteldi
TÚRKІSTAN. KAZINFORM – Óńirde jyl sońyna deıin 1,3 mlrd teńge kólemindegi kedendik salyqtar men tólemderdi eseptep, óndirý josparlanǵan.
Túrkistan oblysy boıynsha Memlekettik kirister departamentiniń basqarma basshysy Aıdos Qadirberdıevtyń aıtýynsha, óńirde bıylǵy І toqsanda 24 kedendik tekserý júrgizilgen. Nátıjesinde 250 mln teńge qosymsha tólem eseptelgen. Onyń 135 mln teńgesi bıýdjetke óndirilgen.
Spıkerdiń sózinshe, qazirgi tańda kedendik baqylaý jumystary avtomattandyrylǵan formatta júzege asyrylyp jatyr.
– Bul tásil tekserýlerdiń ashyqtyǵyn arttyryp, adam faktoryn azaıtýǵa múmkindik berip otyr. Jalpy qosymsha kiris kózderin anyqtaý boıynsha bekitilgen boljamdy josparǵa sáıkes, jyl sońyna deıin 1,3 mlrd teńge kólemindegi kedendik salyqtar men tólemderdi eseptep, bıýdjetke óndirý belgilengen, – dedi ol.
Kedendik zańnamany buzýdyń negizgi túrleri retinde taýardyń kedendik qunyn durys anyqtamaý, deklaratsııalardy toltyrmaý, syrtqy ekonomıkalyq qyzmettiń taýar nomenklatýrasy kodtaryn qate belgileý jáne tarıftik talaptardy saqtamaý jaǵdaılary jıi tirkelgen.
– Valıýtalyq baqylaý baǵytynda 2024 jyldan beri 980 banktik baqylaý kartasy esepke alynǵan. Qabyldanǵan sharalar nátıjesinde jalpy somasy 30,5 mlrd teńgeden astam aıyppul salynyp, májbúrlep óndirý úshin sot oryndaýshylaryna joldanǵan. Ákimshilik tájirıbe aıasynda valıýtalyq zańnamany buzý jaǵdaılary boıynsha 62 is sotqa joldanyp, 169 is qaraldy, – dedi Aıdos Qadirberdıev.
Vedomstvonyń málimdeýinshe, negizgi máselelerdiń qatarynda valıýtalyq túsimdi ýaqtyly qaıtarmaý jáne qujattardy keshiktirip usyný jaǵdaılary bar. Osyǵan baılanysty túsindirý jáne aldyn alý sharalary kúsheıtilip, baqylaý tetikterin jetildirý qolǵa alynǵan.
Budan buryn qazaq-ózbek shekarasynda deldaldar sheteldikterdi mazalaǵanyn jazǵan edik.
