Túrkistan oblysynda qaıtarylǵan aktıvter esebinen mýzykalyq óner mektebiniń qurylysy bastaldy

TÚRKІSTAN. KAZINFORM - Ordabasy aýdanynyń Temirlan aýylynda jańa mýzykalyq óner mektebiniń kapsýlasy salyndy.

Atalǵan mekteptiń qurylysy – Memleket Basshysynyń tapsyrmasyna sáıkes qaıtarylǵan kapıtaldy halyq ıgiligi úshin tıimdi paıdalaný aıasynda Úkimetpen maquldanǵan alǵashqy áleýmettik jobalardyń biri.

Іs-sharaǵa oblys ákimi Nuralhan Kósherov jáne Qazaqstan Bas prokýratýrasynyń Aktıvterdi qaıtarý komıtetiniń tóraǵasy Nurdáýlet Súıindikov, oblys prokýrory Murat Tileýberdıev jáne aýyldyń aqsaqaldary men jergilikti turǵyndar qatysty.

Saltanatty rásim barysynda qatysýshylar jergilikti turǵyndardy qurylys jumystarynyń bastalýymen quttyqtap, bul mekteptiń iske qosylýy elde júrgizilip jatqan aktıvterdi qaıtarý jumystarynyń naqty nátıjesin halyq óz kózimen kórýge múmkindik beretinine senim bildirdi.

Jergilikti aqsaqaldyń batasynan keıin qatysýshylar bolashaq urpaqqa arnalǵan ýaqyt kapsýlasyn saldy.

Aıta keteıik, buǵan deıin aýylda 1974 jyly salynǵan, qazirgi tańda apatty jaǵdaıda turǵan mýzykalyq mektep jumys istep kelgen bolatyn.

Quny 890 mln teńge turatyn 300 oqýshyǵa arnalǵan jańa mektep kórshiles aýyldardyń oqýshylaryn da qabyldaıtyn bolady. 

Eske sala keteıik, budan buryn Túrkistan oblysynda halyqtyń 74 paıyzy aýylda turatyndyǵyn jazǵan bolatynbyz.