Túrkistan oblysynda qatty jelden 2 myńnan asa abonent jaryqsyz qaldy
TÚRKІSTAN. KAZINFORM — 9 aqpanda Túrkistan oblysy Sozaq aýdany aýmaǵynda qatty ekpindi jel men jaýyn-shashyn saldarynan birneshe eldi mekende jaryq sónip qaldy.
Atap aıtqanda, Sholaqqorǵan, Abaı, Baldysý, Qarabulaq, Syzǵan, Qaraqur jáne Jynys eldi mekenderinde elektrmen jabdyqtaý toqtatylyp, jalpy 2034 abonent jaryqsyz qalǵan.
«Ońtústik Jaryq Tranzıt» mekemesiniń habarlaýynsha, mamandar qazirgi tańda elektr jelilerindegi aqaýlardy anyqtap, kezeń-kezeńimen qalpyna keltirý jumystaryn júrgizip jatyr.
— Apattyq jaǵdaılardy joıý úshin avarııalyq qyzmetterdiń jedel brıgadalary jumys istep jatyr. Qalpyna keltirý jumystaryna 60 maman jáne 16 tehnıka tartylǵan. Jumystar elektr energııasy tolyq berilgenge deıin úzdiksiz jalǵasady. Ýaqytsha qolaısyzdyqtarǵa túsinistikpen qaraýlaryńyzdy suraımyz, — dedi ortalyq dıspetcherlik qyzmetiniń bas mamany Dýlat Esenbekov.
Sozaq aýdany ákimdiginiń málimetinshe, jedel júrgizilgen jóndeý-qalpyna keltirý jumystarynyń nátıjesinde Sholaqqorǵan aýylynda elektr energııasynyń berilýi tolyq qalpyna keltirildi. Qazirgi tańda bul eldi mekende 1567 abonent qaıtadan elektr qýatymen qamtylǵan. Qalǵan eldi mekenderde jumystar jalǵasyp jatyr.
Budan buryn Túrkistan oblysynda qys ortasynda 170-ten astam úı gazsyz qalǵanyn jazǵan edik.