Túrkistan oblysynda kásipkerlerdiń jumysyna zańsyz aralasqan 5 laýazymdy tulǵa jaýapqa tartyldy
Túrkistan oblysynda kásipkerlerdiń jumysyna zańsyz aralasqan 5 laýazymdy tulǵa qylmystyq jaýapkershilikke tartyldy. Bul týraly Qazaqstan Respýblıkasy Sybaılas jemqorlyqqa qarsy is-qımyl agenttiginiń Túrkistan oblysy boıynsha departamentiniń basshysy Murat Tóleýbaev málimdedi, dep habarlaıdy QazAqparat tilshisi.
Sybaılas jemqorlyqqa qarsy is-qımyl agenttigimen kásipkerlikti qorǵaýǵa jáne qoldaýǵa baǵyttalǵan «Bızneske jol» jobasy júzege asyrylýda. Máselen, «Túrkistan áleýmettik-kásipkerlik» korporatsııasy tarapynan 15 kásipkerge qoıylǵan negizsiz talaptar alynyp tastaldy. Sondaı-aq, Arys qalasynda keń taralǵan paıdaly qazbalardy óndirý úshin jer ýchaskelerin jyldan asa merzimde rásimdeı almaǵan 8 kásipker oblystyq jer komıssııasy tarapynan kedergi jasalyp jatqany týraly shaǵym túsirgen bolatyn. Departament quzyrly organdarmen keńes ótkizip, máseleni túbegeıli qarap shyqty. Nátıjesinde «Qojatoǵaı» ken ornynda jer ýchaskelerin ýaqytsha óteýli jer paıdalaný quqyǵyn berý týraly qorytyndy shyǵarylyp, kásipkerlerdiń problemalyq máseleleri oń sheshildi.
«Ákimdik basshylyǵynyń jáne basqa da ýákiletti organdardyń kómegimen 1300-ge jýyq kásipkerdiń quqyǵyn qalpyna keltirýge múmkindik týyp, 25 másele oń sheshimin tapty. Kásipkerlerdiń jumysyna zańsyz aralasqany úshin 5 laýazymdy tulǵa qylmystyq, 7 laýazymdy tulǵa tártiptik jaýapkershilikke tartyldy» - dedi, Murat Tóleýbaev.
