Túrkistan oblysynda kásipkerler 200 mlrd teńgeni shetelge zańsyz shyǵarǵany anyqtaldy
ASTANA.KAZINFORM - Túrkistan oblysynda 200 mlrd teńge kólemindegi kóleńkeli qarjy aınalymynyń jáne kontrabandalyq arnalardyń joly kesildi.
Memleket basshysynyń kóleńkeli ekonomıkaǵa qarsy kúres jónindegi tapsyrmalaryn iske asyrý aıasynda Túrkistan oblysynyń prokýratýrasy birqatar zańsyz qarjy jáne kontrabandalyq shemalardyń jolyn kesti.
Prokýratýranyń bastamasymen júrgizilgen jedel is-sharalar nátıjesinde Qyrǵyz Respýblıkasynan kontrabandalyq jolmen temeki ónimderin tasymaldap, olardy Túrkistan oblysy men elimizdiń batys óńirlerinde ótkizýmen aınalysqan tulǵalardyń zańsyz áreketteri toqtatyldy.
Bas prokýratýra málimetinshe, jedel is-sharalar barysynda jalpy quny 103 mln teńge bolatyn temeki ónimderi tárkilendi.
Atalǵan fakti boıynsha QR Qylmystyq kodeksiniń 214-baby boıynsha sotqa deıingi tergep-tekserý júrgizilip jatyr.
Sonymen qatar shekara mańynda júk kólikteriniń júrgizýshilerinen aqsha bopsalaýmen aınalysqan qylmystyq toptyń qyzmeti áshkerelendi. Tergeý barysynda zańsyz deldaldyq qyzmetten alynǵan qarajattyń bir bóligi memlekettik organ laýazymdy tulǵalaryna para retinde berilgeni anyqtaldy.
Qazirgi ýaqytta QR Qylmystyq kodeksiniń 366 jáne 367-baptary boıynsha sotqa deıingi tergep-tekserý júrgizilip jatyr.
Qylmystyq shemaǵa qatysy bar 23 tulǵa anyqtalyp, olardyń 5-eýi kúzetpen ustaldy.
Budan bólek, prokýratýranyń úılestirýimen júrgizilgen jedel jáne arnaıy is-sharalar nátıjesinde jalǵan kásipkerlik sýbektileri arqyly shamamen 200 mlrd teńge kólemindegi qarjy quraldaryn alys jáne jaqyn shetelderge zańsyz shyǵarý faktisi anyqtaldy.
Atalǵan fakti boıynsha QR Qylmystyq kodeksiniń 235-1-babynyń 3-bóligimen sotqa deıingi tergep-tekserý bastaldy.
Qazaqstan Respýblıkasy Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.
Aıta keteıik, Ulytaýda kásiporyn dırektory tergeýshige para bermek bolǵan sátte ustaldy.
