Túrkistan oblysynda qarjylyq pıramıda qurǵandar sottaldy

TÚRKІSTAN. KAZINFORM - Qarjylyq pıramıda uıymdastyrýshylar jábirlenýshilerge 391 mln teńge shyǵyn keltirgen.

Túrkistan oblysynda qarjylyq pıramıdalarǵa qarsy kúres baǵytyndaǵy kezekti sot úkimi shyqty. Bul joly Tólebı aýdandyq soty 20 aıyptalýshyǵa qatysty qylmystyq isti qarady. 

Sot materıaldaryna sáıkes, kúdiktilerdiń úsheýi «Chia Tai Tianging Pharmaceutical Group» atty qarjylyq pıramıdanyń qurylymdyq bólimshesin basqarǵan. Al qalǵan 17 adam pıramıdany jarnamalap, jańa qatysýshylardy tartýmen aınalysqan. 2022-2023 jyldary olar «dárilik preparatty ázirleýge arnalǵan qarajat» degen jeleýmen azamattardy aldap, 279 jábirlenýshige jalpy kólemi 391 mıllıon teńgeden astam shyǵyn keltirgen.

Sot úkimimen basty uıymdastyrýshy 7 jylǵa bas bostandyǵynan aıyryldy. Onyń eki sybaılasy 5 jyl 6 aıǵa sottaldy. Al 17 qatysýshyǵa 2 jyldan 3 jylǵa deıingi merzimge bas bostandyǵyn shekteý jazasy taǵaıyndaldy.

Sottalýshylardyń jaza merzimin jeńildetetin jaǵdaılar da eskerildi. Olardyń arasynda densaýlyq jaǵdaıy, otbasylyq aýyrtpalyǵy jáne kámeletke tolmaǵan balalarynyń bolýy nazarǵa alynǵan. Degenmen, aýyrlatatyn mán-jaılar anyqtalmady.

Atalǵan úkim zańdy kúshine engen joq.

Aıta keteıik, budan buryn Shymkentte oqýshyny urǵan muǵalim qamaýǵa alynǵanyn jazǵan bolatynbyz.