Túrkistan oblysynda qart maıdangerdiń ǵasyr toıy toılanyp, jańa kóliktiń kilti tabystaldy
TÚRKІSTAN. KAZINFORM - Búgin Túrkistan oblysy, Sozaq aýylyndaǵy «Talapty» meıramhanasynda elimizdiń eren erleriniń biri, Uly Otan soǵysynyń ardageri, qart maıdanger Myrzahmet Jylysbaevtyń 100 jyldyq mereıtoıy keń kólemde atalyp ótti.
Іs-sharany Sozaq aýdany ákimdigi men óńirdegi óndiris oryndary birlesip uıymdastyryp, batyr qartqa sý jańa temir tulpardyń kiltin tabystady.
Aýdan ákimi Muhıt Turysbekov ardagerge ystyq yqylasyn bildirip, el úshin sińirgen eńbegin erekshe atap ótti.
- Búgingi beıbit kún – siz sekildi maıdangerlerdiń janqııarlyq erliginiń jemisi. Sizderdeı erlerdiń arqasynda biz beıbit ómir súrip kelemiz. Erligińiz ben elge sińirgen eńbegińiz eshqashan umytylmaıdy. Bul toı – tutas eldiń, tutas urpaqtyń alǵysy men qurmeti. El bolyp, jurt bolyp, sizdi qurmet tutamyz!, - dedi aýdan basshysy.
Sonymen qatar, ardagerge arnaıy daıyndalǵan avtokóliktiń kiltin saltanatty túrde tabystap, ónegeli ǵumyryna taǵzym bildirdi.
Atalǵan mereıli toıǵa Túrkistan oblystyq «AMANAT» partııasy fılıaly tóraǵasynyń orynbasary Qalıma Jantóreeva, oblystyq máslıhat depýtaty Begimbet Baıǵaraev, aýdandyq máslıhat tóraǵasy Ordabek Jámıev, aýdandyq ardagerler keńesiniń tóraǵasy Qabylbek Espenbetov, quqyq qorǵaý organdarynyń basshylary, aýdan ákiminiń salalyq orynbasarlary, mekeme basshylary, máslıhat depýtattary, ardagerdiń týǵan-týystary men aýyl turǵyndary qatysty. Barlyǵy da ardagerdi quttyqtap, el úshin etken eńbegine bas ıip, shynaıy yqylas bildirdi.
Óz kezeginde qart maıdanger Myrzahmet Jylysbaev: «Myna jasqa jetkizgen Allaǵa shúkir. Elge aman kelip, beıbit ómir súrgenime qýanamyn. Osyndaı qurmet kórip, el-jurttyń alǵysyna bólenip otyrǵanyma júregim tolqyp tur. Aýdan basshylaryna, uıymdastyrýshylarǵa, aýyldastaryma úlken rahmet! El aman, jurt tynysh bolsyn. Táýelsizdigimiz baıandy bolsyn!» – dep alǵysyn tebirenispen jetkizdi.