Túrkistan oblysynda qansha mektepte sport zaly men ashana joq

TÚRKІSTAN. KAZINFORM — Óńirde matematıka, fızıka, aǵylshyn jáne orys tili pániniń muǵalimderi jetispeıdi. 

Túrkistan oblysyndaǵy 126 mektepte búgingi tańda sport zal joq. Oblystyq bilim basqarmasy usynǵan aqparatqa súıensek, sport zaly joq mektepter shalǵaı aýyldyq eldi mekenderde ornalasqan.

Olardyń ǵımaraty yńǵaılastyrylyp saman qyshtan soǵylǵan. Sondaı-aq, shalǵaı aýyldarda ornalasqan bala sany 30-ǵa deıingi shaǵyn jınaqty 47 mektepte ashana joq.

Jergilikti jaýapty mamandar ashana men sport zaldardyń máselesi jańa mektepterdiń qurylysymen sheshiletindigin aıtyp otyr. 

Sondaı-aq, óńir mektepterinde búgingi kúni 27 bos muǵalim orny bar. 

Máselen, qazaq tili jáne ádebıetinen — 1, orys tili jáne ádebıetinen — 3, aǵylshyn tilinen — 3, fızıkadan — 3, matematıkadan — 7, hımııadan — 1, tarıhtan — 1, beıneleýden — 1, bastaýysh synyptan — 5 jáne basqa pánder boıynsha 2 maman qajet. 

Sonymen qatar, jalpy bilim beretin 53 mekeme basshysynyń orny bos. 

— Túrkistan oblysynda jyldan jylǵa rezervshiler sany artyp keledi. 2023 jyly rezervte 26 adam bolsa, 2024 jyly bul kórsetkish 43-ke artyp otyr. 2023 jyly esepke alynǵan 26 rezervshiniń 24-i jumysqa ornalasty. Al, 2024 jyly tirkelgen 43 rezervshiniń 22 taǵaıyndaldy. Qalǵan rezervshiler otbasyna baılanysty, zeınet jasqa tolyp ketetin bos laýazymǵa úmitker bolýdy josparlap otyr. Bıyl «Bilim berýdegi ózgeristiń 1000 kóshbasshysy» baǵdarlamasy aıasynda 10 aqpan men 10 naýryz aralyǵynda konkýrs jarııalanyp, 477 úmitker tirkeldi, — delingen basqarma aqparatynda.

Aıta keteıik, budan buryn Túrkistan oblysynda attestattaýdan ótpegen 1 mektep pen 2 balabaqsha jabylǵanyn jazǵan bolatynbyz.