Túrkistan oblysynda qansha ardager turady

TÚRKІSTAN. KAZINFORM — Óńirde merekege oraı beriletin bir rettik áleýmettik kómektiń mólsheri belgili boldy. 

Búginde Túrkistan oblysynda Ekinshi dúnıejúzilik soǵystyń 3 ardageri turady. Eń jasy úlkeni — saryaǵashtyq 103 jastaǵy Ermahon Ishohonov. Jetisaılyq Petr Papkov 101 jasta bolsa, saıramdyq Ahmedjan Anartaev bıyl ǵasyrlyq beleske jetpek.

Sonymen qatar óńirde Ekinshi dúnıejúzilik soǵysynyń qatysýshylaryna teńestirilgen 1462 adam, 2082 tyl ardageri jáne qaıtys bolǵan soǵys múgedekteriniń 86 jubaıy bar.

Jergilikti ákimdikterdiń málimetine sáıkes, bıyl máslıhat sheshimderi negizinde 9 mamyr — Jeńis kúnine oraı bir rettik áleýmettik kómek kórsetý josparlanǵan.

— Jetisaı jáne Saryaǵash aýdandarynda turatyn eki qart maıdangerge 5 mln teńgeden, al Saıram aýdanyndaǵy bir soǵys ardagerine 1 mln 650 myń teńge beriledi. Sonymen qatar soǵysqa qatysýshylarǵa teńestirilgen azamattarǵa 129 600 teńge, tyl ardagerlerine 64 800 teńge, al qaıtys bolǵan soǵys múgedekteriniń jubaılaryna 86 400 teńge kóleminde tólem qarastyrylǵan, — dep habarlady oblystyq jumyspen qamtýdy úılestirý jáne áleýmettik baǵdarlamalar basqarmasy.

Budan bólek ardagerlerge densaýlyǵyn jaqsartý maqsatynda sanatorlyq-kýrorttyq mekemelerge tegin joldamalar usynylady.

Vedomstvo málimetinshe, Jeńis kúni qarsańynda oblys ortalyǵy men barlyq aýdan-qalalarda ardagerlerdi qurmetteýge baǵyttalǵan is-sharalar uıymdastyrylady. Olardyń qatarynda ardagerlerdiń úılerine arnaıy baryp quttyqtaý rásimderi jáne «Ardagerlerdi ardaqtaıyq» atty keń aýqymdy aktsııalar ótkizý kózdelgen.

Budan buryn Shymkentte merekelik bir rettik áleýmettik kómek kimderge beriletinin jazǵan edik.