Túrkistan oblysynda qańly dáýirine tıesili Han ımperııasynyń aınasy tabyldy
TÚRKІSTAN. KAZINFORM - Ordabasy aýdanyna qarasty Qaraaspan aýyld okrýginde ornalasqan Tólebaıtóbe qorymyndaǵy 3 obaǵa Ózbekáli Jánibekov atyndaǵy Ońtústik Qazaqstan pedagogıka ýnıversıtetiniń arheologııa ortalyǵy qazba jumystaryn júrgizdi. Nátıjesinde zertteýshiler qańly dáýirine tıesili Han áýletiniń aınasyn tapty.
Áıel adamnyń qabirinen tabylǵan qola aına sol zamandarda qymbatqa baǵalanǵan. Ony tek aýqatty, baı-qýatty adamdar ǵana qoldanǵan.
Tarıhı jádigerge qarap qaıtys bolǵan adamnyń joǵary dárejeli qyzmette bolǵanyn bilýge bolady.
«Aınanyń pishini dóńgelek, ortasynda jip ótkizýge arnalǵan tesigi bar, al betki jaǵy 8 arkaly. Osyǵan uqsas aınalar buǵan deıin Kýshan ımperııasynyń ortalyǵy Aýǵanstan aýmaǵyndaǵy Tıllıa tepe qalashyǵynan jáne Ońtústik Oraldaǵy sarmat patshalarynyń jerleý ornynda kezdesken. Sondaı-aq, kóshpeli sıýnný (hýnný) azııalyq ımperııa shanıýlarynyń qabirlerinen de tabylǵan» delingen arheologııa ortalyǵy taratqan aqparatta.
Úsh birdeı obaǵa zertteý jumystaryn júrgizgen ǵalymdar 1,2 obalar kóne zamanda tonalǵanyn aıtady.
Al, úshinshi obadan óte qundy jádigerler shyqqan.
Atap aıtqanda, olardyń ishinde qumyra, Han kezeńine tıesili qola aına, Rım kezeńinde qoldanysta bolyp túıreýish rólin atqarǵan fıbýla, syrǵa, sonymen qosa maıda bıser men qolǵa taǵýǵa arnalǵan iri monshaqtar, aıaq kıim men beldiktiń toǵasy, qus aýlaý úshin arnaıy jasalynǵan jebe bar.
«Tabylǵan jádigerlerge qarap Qańly memleketi myqty jáne qýatty ımperııalarmen baılanysta bolǵandyǵyn bilýge bolady. Uly Jibek jolynyń ortalyǵynda ornalasqan Batys pen Shyǵysty jalǵastyrǵan saýda-sattyqty damytyp, úlken qalalardy gúldendirgen Qańly memleketimen Rım, Vızantııa, Kýshan, aspan asty eli Qytaı teń dárejede dıplomatııalyq qarym-qatynasta bolǵan. Al, jerleý ornynyń ýaqyty b.z.d. II ǵ. men b.z. IV ǵ. qamtıdy» delingen aqparatta.
Arheologııalyq ekspedıtsııa jetekshisi, tarıh ǵylymdarynyń doktory, professor Aleksandr Podýshkın atalǵan jaýharlar tarıhı qundylyǵyna qaraı Ulttyq mýzeıge tapsyrylatynyn aıtty.
Zertteý jumysyna Ordabasy tarıhı-ulttyq mýzeıiniń ǵylymı qyzmetkerleri de qatysty.
