Túrkistan oblysynda kámeletke tolmaǵandar arasyndaǵy qylmys 14,5%-ǵa tómendedi
ASTANA. KAZINFORM — Óńirde kámeletke tolmaǵandarǵa qatysty jasalǵan qylmystar sany da 5,4%-ǵa azaıǵan, dep habarlaıdy Іshki ister mınıstrliginiń baspasóz qyzmeti.
Túrkistan oblysy polıtsııa departamentinde vedomstvo basshysy Arystanǵanı Zapparovtyń tóraǵalyǵymen apparattyq keńes ótti. Jıynda kámeletke tolmaǵandar arasyndaǵy quqyq buzýshylyqtardyń aldyn alý jáne adam óltirýge jol bermeý baǵytyndaǵy profılaktıkalyq jumystardyń nátıjeleri talqylandy.
Profılaktıkalyq jumysty úılestirý basqarmasynyń bastyǵy Begimhan Ahmetovtiń málimetinshe, osy jyldyń jeti aıynda oblysta kámeletke tolmaǵandar arasyndaǵy qylmys 14,5%-ǵa tómendegen.
— Atap aıtqanda, qylmystar sany 83-ten 71-ge azaıǵan. Sonymen qatar kámeletke tolmaǵandarǵa qatysty jasalǵan qylmystar sany da 5,4%-ǵa tómendedi. Jasóspirimderdiń túngi ýaqytta zańdy ókilderinsiz turǵynjaıdan tys júrýiniń aldyn alý maqsatynda polıtsııa turaqty túrde reıdtik is-sharalar júrgizip keledi. Nátıjesinde zań talaptaryn buzǵan 6 683 ata-ana ákimshilik jaýapkershilikke tartyldy, — dedi Ahmetov.
Apparattyq keńeste otbasy-turmystyq qatynastar salasyndaǵy qylmystardyń aldyn alý máselesine de erekshe nazar aýdaryldy. Jyl basynan beri atalǵan salada adam óltirý nemese adam óltirýge oqtalý faktileriniń tirkelmegeni oń nátıje retinde atap ótildi.
Jıyn qorytyndysy boıynsha oblystyń bas polıtseıi Arystanǵanı Zapparovtyń jasóspirimder arasynda quqyq buzýshylyq jasaýǵa beıim tulǵalardy erte anyqtaý, janjalǵa beıim otbasylarmen profılaktıkalyq jumysty kúsheıtý, zańsyz qarý aınalymynyń jolyn kesý jáne qoǵamdyq oryndardaǵy reıdtik is-sharalardy jandandyrý jóninde naqty tapsyrmalar berdi.
Polıtsııa departamenti qylmystyń aldyn alý jáne qoǵamdyq qaýipsizdikti qamtamasyz etý baǵytyndaǵy jumystardy múddeli memlekettik organdarmen birlesip jalǵastyrady.
Buǵan deıin Túrkistan oblysynda qarýdy saqtaý talabyn buzǵan 700-ge jýyq azamat jaýapqa tartylǵanyn jazǵanbyz.
