Túrkistan oblysynda er adam ystan ýlanyp kóz jumdy, áıeli aýyr halde aýrýhanaǵa jetkizildi

TÚRKІSTAN. KAZINFORM – Túrkistan oblysy Túlkibas aýdany Aqbıik aýylynda peshten shyqqan ystan bir otbasynyń eki múshesi ýlanyp, er adam qaza boldy. Áıeli aýyr halde aýrýhanaǵa jetkizildi.

Qaıǵyly oqıǵa 1 aqpan kúni tańǵy ýaqytta bolǵan.

Oblystyq tótenshe jaǵdaılar departamentiniń málimetinshe, jer úı aýmaǵyndaǵy ýaqytsha qurylysta kómirmen jumys isteıtin jylytý peshin paıdalaný talaptarynyń buzylýy saldarynan eki adam kómirqyshqyl gazynan ýlanǵan.

Oqıǵa saldarynan 1976 jyly týǵan er adam oqıǵa ornynda kóz jumdy. Al onyń jubaıy, 1991 jyly týǵan áıel aýyr halde aýrýhananyń jansaqtaý bólimine jatqyzyldy.

– 1 aqpan kúni saǵat 07:51-de jeke turǵan ýaqytsha turǵyn úıde qatty otynmen jumys isteıtin jylytý peshiniń aqaýlyǵy, naqtyraq aıtqanda murjanyń tazalanbaýy saldarynan kómirqyshqyl gazymen ýlaný deregi tirkeldi, – dep habarlady oblystyq TJD.

Úı ıesiniń aıtýynsha, ýlanǵan azamattar atalǵan mekenjaıǵa 31 qańtar kúni erkin jaldamaly jumysshylar retinde kelgen.

Budan buryn Túrkistan oblysynda bir otbasynyń úsh adamy ıis tıip qaıtys bolǵanyn jazǵan edik.