Túrkistan oblysynda ınvestordyń qum óndirýine ákimdik kedergi keltirdi me
TÚRKІSTAN. KAZINFORM — Keles aýdanyndaǵy kompanııa qum óndirýge jer rásimdeý kezinde kedergilerge tap bolǵanyn málimdedi. Oblys ákimdigi jer ýchaskesiniń aýyl sharýashylyǵy maqsatyndaǵy jerge jatatynyn jáne jergilikti turǵyndardyń qarsylyǵy baryn aıtty.
Áleýmettik jelilerde «Ermahan ı D. N.» JShS ókili, zańger Murat Sadyqtyń úndeýi tarady. Ol kompanııaǵa qatysty jergilikti atqarýshy organdar tarapynan zańsyz áreketter jasalǵanyn málimdegen.
Beınejazbada jarııalaǵan túsiniktemesinde zańger bul jaǵdaıdy ınvestorlardy qoldaý jónindegi tapsyrmalardyń oryndalýyna kedergi keltirýi múmkin áreket dep baǵalaǵan. Onyń aıtýynsha, kompanııa lıtsenzııa alyp, qajetti qujattardy daıyndaǵanymen, jergilikti atqarýshy organnyń kelisimi bolmaǵandyqtan jumysyn bastaı almaı otyr.
Zańgerdiń málimetinshe, kásiporyn 2024 jylǵy 21 mamyrda qum óndirýge lıtsenzııa alǵan. «Bozsý» jer qoınaýy ýchaskesiniń aýmaǵy — 139,5 gektar. Jumysty bastaý úshin kompanııa jerge qatysty qujattardy rásimdeýi qajet.
Óndiriletin materıaldy «QazAvtoJoldyń» iri jol jobalarynyń birin ınertti materıaldarmen qamtamasyz etý úshin paıdalaný josparlanǵan.
— 2024 jyldan beri jergilikti atqarýshy organdardyń sozbalańǵa salýyna baılanysty qajetti qujattar rásimdelmeı keledi. Saldarynan «Ermahan ı D. N.» JShS lıtsenzııada kózdelgen mindettemelerin oryndaı almaı otyr, — dedi kompanııa ókili.
Kásiporyn jer ýchaskesin berý týraly eki ret ótinish bergen. Keles aýdanynyń jer komıssııasy kompanııanyń ótinishin 2024 jylǵy 14 tamyzda jáne 15 qazanda qanaǵattandyrýdan bas tartqan. Buǵan turǵyndardyń qarsylyǵy, aýmaqtyń jaıylym retinde paıdalanylýy, bos jer ýchaskeleriniń bolmaýy, sondaı-aq joldarǵa, aýyl sharýashylyǵy jerlerine jáne qorshaǵan ortaǵa yqtımal zııan keltirý qaýpi sebep bolǵan.
Osydan keıin Keles aýdanynyń ákimdigi 2024 jylǵy 16 qazanda 139,5 gektar jer ýchaskesin ýaqytsha óteýli jer paıdalaný quqyǵymen berýden bas tartý týraly qaýly qabyldaǵan.
Kompanııa jergilikti organdardyń sheshimderine shaǵym túsirdi. Túrkistan oblysynyń mamandandyrylǵan aýdanaralyq ákimshilik soty talap aryzdy ishinara qanaǵattandyrdy.
Sot jer qoınaýyn paıdalaný úshin jer ýchaskesin berý týraly sheshim qabyldaý Túrkistan oblysy ákiminiń quzyretine jatatynyn anyqtady. Keles aýdanynyń ákimi kompanııanyń ótinishterin ýákiletti organǵa joldaýy tıis bolǵan. Alaıda olardy aýdandyq jer komıssııasyna jibergen.
Sot aktisinde aýdan ákiminiń bas tartý týraly qaýly qabyldaýǵa ókilettigi bolmaǵany kórsetilgen. Sonymen qatar atalǵan jer ýchaskesin berý týraly sheshim qabyldaý jer komıssııasynyń quzyretine jatpaǵan.
Budan bólek sot komıssııa otyrysynyń aýdıo jáne beınejazbasyn zerdeleı kele, 2024 jylǵy 14 tamyzda jer ýchaskesin berý máselesi ashyq daýysqa qoıylmaǵanyn anyqtady. Komıssııa músheleri tek kún tártibin maquldaý úshin daýys bergen, keıin qorytyndyǵa qol qoıǵan.
Sot jer komıssııasynyń 2024 jylǵy 14 tamyzdaǵy jáne 15 qazandaǵy qorytyndylaryn, sondaı-aq Keles aýdany ákimdiginiń 2024 jylǵy 16 qazandaǵy qaýlysyn zańsyz dep tanyp, kúshin joıdy.
Sonymen qatar sot jer komıssııasyn kompanııanyń paıdasyna sheshim qabyldaýǵa mindetteýden bas tartty. Óıtkeni mundaı jer ýchaskesin berý nemese bermeý týraly sheshim qabyldaý onyń quzyretine kirmeıdi. Sot sheshimi zańdy kúshine engen joq jáne oǵan shaǵym berilýi múmkin.
Túrkistan oblysy ákimdiginiń habarlaýynsha, paıdaly qazbalardy óndirý máselesi jergilikti turǵyndarmen birneshe ret talqylanǵan. Vedomstvo málimetinshe, turǵyndar mundaı jumystardy júrgizýge úzildi-kesildi qarsy.
— Aýmaǵy 139,5 gektar bolatyn atalǵan jer ýchaskesi aýyl sharýashylyǵy maqsatyndaǵy jerlerge jatady jáne qazirgi ýaqytta sharýa qojalyqtary paıdalanyp otyr. Ony berý jáne paıdalaný máselesi zańnamada belgilengen tártippen jeke qaralady, — dep habarlady ákimdik.
Oblys ákimdigi memlekettik organdar turǵyndardyń zańdy múddelerin eskerip, zańnama talaptaryn saqtaýy qajet ekenin atap ótti.
— Jer ýchaskesin berý nemese paıdaly qazbalardy belgilengen tártipti buza otyryp óndirýge jol berilmeıdi. Bul máselege qatysty barlyq sheshim qoldanystaǵy zańnama aıasynda ǵana qabyldanady, — dep málimdedi oblys ákimdigi.
Eske salaıyq, Sheteldik ınvestorlar keńesiniń 38-shi plenarlyq otyrysynda Prezıdent Qasym-Jomart Toqaev Qazaqstan ınvestıtsııa tartý kórsetkishi boıynsha Ortalyq Azııadaǵy kóshbasshylyǵyn saqtaýdy kózdeıtinin málimdegen edi.
