Túrkistan oblysynda ınternet-alaıaqtyqqa qatysy bar úsh qylmystyq top ustaldy

TÚRKІSTAN. KAZINFORM – Jábirlenýshilerge 269 mıllıon teńge qaıtaryldy.

Túrkistan oblystyq Polıtsııa departamenti janynan qurylǵan kıberqylmyspen kúres basqarmasynyń qyzmetkerleri ınternet-alaıaqtyqqa qatysty 113 qylmystyq isti sotqa joldady. Tergeý barysynda úsh qylmystyq toptyń áreketi áshkerelenip, olardyń 38 epızod boıynsha qylmys jasaǵany anyqtaldy. Nátıjesinde jábirlenýshilerge 269 mıllıon teńge kólemindegi shyǵyn óteldi.

Sonymen qatar 200-den astam qylmysqa qatysy bar, 13 kúdiktiden quralǵan uıymdasqan qylmystyq top quryqtaldy. Qazir atalǵan fakti boıynsha sotqa deıingi tergeý amaldary júrgizilip jatyr.

«Kıbernadzor» júıesi arqyly óńir aýmaǵynda 2000-ǵa jýyq zańsyz kontent buǵattaldy.

Túrkistan oblysynyń Polıtsııa departamenti men oblys prokýratýrasynyń bastamasymen ótken «kıberalaıaqtyq: aldyn alý, qorǵaý, jaýapkershilik» taqyrybyndaǵy forýmda alaıaqtarmen kúres barysy talqylandy.

Іs-shara barysynda oblys ákiminiń birinshi orynbasary Zulpyhar Joldasov, oblystyq Polıtsııa departamentiniń bastyǵy Murat Qabdenov jáne oblys prokýrory Murat Tileýberdıev óńirdegi alaıaqtyq qylmystardyń aldyn alý baǵytynda atqarylyp jatqan jumystarǵa keńinen toqtaldy.

Forým aıasynda sala mamandary kópshilikke alaıaqtardyń arbaýyna túsip qalmaýdyń joldaryn túsindirip, naqty ádis-tásildermen bólisti.

Aıta keteıik, budan buryn polıtsııa keń taraǵan bes kıberqylmys túrin ataǵanyn jazǵan bolatynbyz.