Túrkistan oblysynda ımportty almastyratyn 20 joba iske asyrylady
ASTANA. KAZINFORM — Túrkistan oblysy ımportty almastyratyn 20 jobany qolǵa aldy jáne 53 mlrd teńgege jýyq ımport taýaryn almastyrýdy kózdep otyr. Bul týraly Túrkistan oblysynyń ákimi Nuralhan Kósherov eseptik baıandamasynda aıtty.
Ákimniń aıtýynsha, óndiristi damytý maqsatynda oblysqa syrttan keletin taýarlarǵa taldaý júrgizilgen. Import kólemi 98 mlrd teńgeni quraǵan.
Negizgi úles qurylys materıaldary, jeńil ónerkásip, mashına jasaý, hımııa ónerkásibi jáne tamaq óndirisine tıesili.
— Bul taýarlardy oblysta shyǵarýǵa barlyq múmkindigimiz bar. Investorlarmen kelissózder júrgizip, olarǵa ındýstrıaldyq jáne arnaıy ekonomıkalyq aımaqtardan daıyn alań usyndyq, — dedi N. Kósherov elordada Ortalyq kommýnıkatsııalar qyzmetinde ótken brıfıngte.
Óńirde ımportty almastyratyn 20 joba iske asyrylyp jatyr. Bul óz kezeginde 53 mlrd teńgege jýyq ımport taýarlaryn almastyrýǵa múmkindik beredi.
— Budan basqa birneshe mańyzdy jobalardy iske asyryp jatyrmyz. Indýstrıaldy aımaqtarda quny 152 mlrd teńgeni quraıtyn 99 ınvestıtsııalyq joba iske asyrylýda. 6 361 jumys orny ashylady. Qazir 39 mlrd teńge ınvestıtsııa tartylyp, 50 joba iske qosyldy, 2 609 adam turaqty jumyspen qamtyldy, — dedi Túrkistan oblysynyń ákimi.
Oblystyń ónerkásiptik áleýetin damytý maqsatynda 20 ındýstrıaldyq jáne «Turan» arnaıy ekonomıkalyq aımaqtary qurylǵan. Onda 211,8 mlrd teńgege 28 iri joba júzege asyrylyp jatyr.
Aıta keteıik, Túrkistan oblysynda Memleket basshysynyń tapsyrmasyna sáıkes jańa ekonomıkalyq baǵyt belsendi júzege asyrylyp jatyr. Óńir qysqa merzim ishinde rekordtyq ınvestıtsııa tartyp, jańa óndiris oryndaryn ashý, agroónerkásipti tereń óńdeý jáne ındýstrııalyq aımaqtardy damytý boıynsha respýblıkada aldyńǵy qatarǵa shyqty.