Túrkistan oblysynda halyqaralyq izdeýde júrgen kúdikti ustaldy

TÚRKІSTAN. KAZINFORM — Smart kamera kúdiktini birden tanyǵan.

Túrkistan oblysy polıtsııa departamenti krımınaldyq polıtsııa basqarmasynyń qyzmetkerleri jedel-izdestirý is-sharalary barysynda alty jyl boıy halyqaralyq izdeýde júrgen 40 jastaǵy er adamdy ustady. Ol esirtkini zańsyz satýmen baılanysty qylmys jasaǵany úshin 2019 jyldan beri izdeýde bolǵan. Adamnyń betin taný fýnktsııasy bar «FaceID» smart kamerasy kúdiktini birden tanyǵan. Sodan polıtsııa qyzmetkerleri jedel áreket etip, qolǵa túsirdi.

— Qazirgi ýaqytta polıtsııa jedel-tergeý is-sharalaryn jalǵastyrýda. Ustalǵan er adam ýaqytsha ustaý ızolıatoryna qamaldy. Bolǵan oqıǵanyń barlyq mán-jaılary anyqtalýda, — delingen Túrkistan oblysy polıtsııa departamentiniń baspasóz qyzmeti usynǵan aqparatta.

Aıta keteıik, jyl basynan beri Túrkistan oblysynyń polıtseıleri izdeýde júrgen 22 qylmyskerdi, onyń ishinde halyqaralyq izdeýde júrgen 10 adamdy anyqtap ustady.

Eske salaıyq, budan buryn Túrkistan oblysynda kámeletke tolmaǵan qyzdy zorlaǵan kúdikti qamaýǵa alynǵanyn jazǵan bolatynbyz.