Túrkistan oblysynda esirtkiniń zańsyz aınalymyna qatysty 130-dan astam qylmys anyqtaldy

TÚRKІSTAN. KAZINFORM — Túrkistan oblysynda byltyr zańsyz aınalymnan bir tonnadan astam esirtki tárkilendi.

Oblystyq polıtsııa departamenti basshysynyń orynbasary Baýyrjan Zııataevtyń aıtýynsha, óńirde bir jylda esirtkiniń zańsyz aınalymyna qatysty 425 derek anyqtalǵan. Onyń 131-i — qylmys, al 294-i — teris qylyqty quqyq buzýshylyqtar.

Sonymen qatar esirtkini zańsyz egý boıynsha 65 derek, al esirtki satý faktileri boıynsha 43 derek tirkelgen.

— Asa iri kólemde esirtki saqtaý boıynsha 19 derek anyqtalyp, 2 uıymdasqan qylmystyq toptyń joly kesildi. Internet arqyly sıntetıkalyq esirtki taratýmen kúres nátıjesinde 1 382 aqparattyq saıt buǵattaldy. Prokýratýra organdarymen birlesip júrgizilgen elektrondy banktik esepshottarǵa monıtorıng barysynda esirtki satýmen aınalysýy múmkin 1 761 bank kartasy anyqtalyp, «Antıfrod» baǵdarlamasy arqyly olardyń aınalymyna shekteý qoıyldy. Al kınologııalyq qyzmet ortalyǵynyń kómegimen 50 qylmys ashyldy, — dedi spıker.

Sondaı-aq «Qarasora» jedel-profılaktıkalyq is-sharasy barysynda Shardara aýdany aýmaǵynan úsh esirtki alqaby tabylǵan. Budan bólek Jambyl oblysynyń shekara aýmaǵyndaǵy «Shaqpaq Baba» beketinde 13 quqyq buzý anyqtalyp, jalpy 40 keliden astam esirtki tárkilendi. Atalǵan fakti boıynsha 5 tulǵa ustalyp, qamaýǵa alyndy.

Ótken jyly Sozaq aýdanynda quramynda esirtki zaty bar iri plantatsııa anyqtalǵan bolatyn. Oqıǵaǵa baılanysty Qyzylorda oblysynyń eki jáne Shymkent qalasynyń bir turǵyny ustaldy. Olardan 900-den astam qarasora jáne 260-qa jýyq kóknár túpteri tárkilendi.