Túrkistan oblysynda erekshe balalarǵa sabaq ótpeı, muǵalimderge jalaqy tólengeni anyqtaldy

TÚRKІSTAN.KAZINFORM — Túrkistan oblysynda 23 mektepte erekshe bilim berý qajettilikteri bar 64 balaǵa úıde sabaqtyń is júzinde ótkizilmegeni, alaıda muǵalimderge eńbekaqynyń tólenip otyrǵany anyqtaldy. 

Túrkistan oblysy Saryaǵash aýdanynyń prokýratýrasy ınklıýzıvti bilim berý salasynda Eńbek jáne Bıýdjet kodeksteriniń saqtalýyna taldaý júrgizdi.

— Taldaý nátıjesinde: aýdandaǵy 23 mektepte erekshe bilim berý qajettilikteri bar 64 balaǵa úıde sabaqtyń is júzinde ótkizilmegeni, alaıda muǵalimderge eńbekaqynyń tólenip otyrǵany anyqtaldy.

«D.MED» júıesi arqyly bul balalardyń elimizdiń ár óńirindegi aýrýhanalarda uzaq ýaqyt boıy em qabyldaǵany jáne úı jaǵdaıynda bilim alý múmkindikteriniń bolmaǵany belgili boldy, — delingen Túrkistan oblysynyń prokýratýrasy habarlamasynda. 

Soǵan qaramastan, muǵalimderge sabaq ótkizgeni úshin tólemder jasalǵan.

Mysaly, №16 mekteptiń bir oqýshysy jyl boıy emdeýde bolǵanyna qaramastan, muǵalimder ony «oqytqany» úshin 319 101 teńge alǵan.

Jalpy zańsyz tólem kólemi 4 255 997 teńge.

Prokýrorlyq qadaǵalaý aktisiniń negizinde bul qarajat bıýdjetke qaıtarylyp, bilim berý salasynyń 311 qyzmetkeri tártiptik jaýapkershilikke tartyldy. 

Aıta ketelik Oralda júrgizýshilik quqyǵynan aıyrylsa da, rýlge otyrǵan muǵalimge aıyppul salynǵan edi.