Túrkistan oblysynda er adam jubaıyn óltirip, artynsha ózine qol jumsady

TÚRKІSTAN. KAZINFORM – Qaıǵyly jaǵdaıdan kámeletke tolmaǵan tórt bala jetim qaldy.

Saıram aýdanyna qarasty Qaramurt aýylynda otbasylyq janjal adam ólimimen aıaqtaldy. Áleýmettik jelilerde taraǵan málimetke súıensek, 14 jyl nekede turǵan erli-zaıyptylar arasyndaǵy janjaldan keıin kúıeýi áıelin aıaýsyz soqqyǵa jyǵyp, onyń ómirin qıǵan. Artynsha ózi asylyp qalǵan. Qaıǵyly jaǵdaıdan kámeletke tolmaǵan tórt bala jetim qaldy. Qazir atalǵan fakti boıynsha qylmystyq is qozǵaldy.

- Aldyn ala málimet boıynsha, jergilikti turǵyn úı jaǵdaıynda jubaıyna dene jaraqatyn salǵan. Saldarynan ol qaıtys bolǵan. Osy oqıǵadan soń er adam qylmystyń sebepterin sıpattaıtyn aýdıojazba qaldyryp, ózin-ózi óltirgen. Qazirgi ýaqytta sotqa deıingi tergeý amaldary júrgizilip, oqıǵanyń barlyq mán-jaılaryn anyqtaýǵa baǵyttalǵan qajetti is-sharalar atqarylyp jatyr, - delingen Túrkistan oblysy Polıtsııa departamenti taratqan aqparatta.

Polıtsııa departamenti tergeý barysy basshylyqtyń qatań baqylaýynda ekenin málimdedi. QR Qylmystyq-protsestik kodeksiniń 201-babyna sáıkes, tergeý múddesine baılanysty ózge málimetter jarııa etilmeıdi.

Aıta keteıik, budan buryn Shymkentte 9-synyp oqýshysynyń ólimine baılanysty qylmystyq is qozǵalǵanyn jazǵan bolatynbyz.