Túrkistan oblysynda er adam poıyz astyna túsip, qaza tapty

TÚRKІSTAN. KAZINFORM – Túrkistan oblysyndaǵy Qostúıin stantsııasynda qaıǵyly jaǵdaı tirkeldi. Temirjol qyzmetkeri №77 jolaýshylar poıyzynyń astyna túsip, aýyr jaraqatynan oqıǵa ornynda kóz jumdy.

Aldyn ala málimetterge sáıkes, poıyz shamamen 78 km/saǵ jyldamdyqpen qozǵalyp kele jatqan. Qaýip týyndaǵan sátte mashınıst shuǵyl tejegishti iske qosqanymen, temirjolshy joldan shyǵyp úlgermegen.

– Túrkistan stantsııasynyń jelilik polıtsııa bólimi abaısyzda adam ólimine ákep soqqan temirjol kóligi júrisi nemese olardy paıdalaný qaýipsizdigi qaǵıdalaryn buzý faktisi boıynsha qylmystyq is qozǵady. Qazirgi ýaqytta is boıynsha oqıǵanyń mán-jaıyn anyqtaýǵa baǵyttalǵan qajetti tergeý áreketteri júrgizilip jatyr, – dep habarlady Kóliktegi polıtsııa departamenti.

Vedomstvo ókilderi Qylmystyq-protsestik kodeksiniń 201-babyna sáıkes ózge aqparat jarııalaýǵa jatpaıtynyn málim etti.

Budan buryn Jetisý oblysynda poıyz kenetten jolǵa shyqqan kisini basyp ketkenin jazǵan edik.