Túrkistan oblysynda energetıkalyq sýsyndardy jastarǵa satý tártibi kúsheıtildi
TÚRKІSTAN. KAZINFORM – Túrkistan oblysynda energetıkalyq sýsyndardy tutynýdy shekteý jáne satý erejelerin saqtaý maqsatynda aqparattyq jumystar júrgizilip jatyr.
2025 jyldyń qańtarynan bastap Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly» kodeksine engizilgen ózgeristerge sáıkes, energetıkalyq sýsyndardy 21 jasqa tolmaǵan azamattarǵa satý zańmen tyıym salynǵan. Sonymen qatar saýda nysandarynyń ıelerine «Energetıkalyq sýsyndardy jıyrma bir jasqa deıingi adamdarǵa satýǵa tyıym salynady» degen eskertý jazbasy kórneki jerde ornalastyrý mindetteldi.
Aldyn ala júrgizilgen tekserý barysynda keıbir saýda núkteleriniń bul talaptan habarsyz ekeni anyqtaldy. Osyǵan baılanysty prokýratýra organdarynyń bastamasymen oblystaǵy barlyq saýda ornynda, sonyń ishinde mektep mańyndaǵy dúkenderde túsindirý jumystary júrgizilip, qajetti eskertý jazbalary ilindi.
Endi satýshylar satyp alýshynyń jasyn anyqtaý úshin jeke kýáligin suraýǵa jáne qujat kórsetilmegen jaǵdaıda ónimdi satýdan bas tartýǵa mindetti.
Prokýratýra organdary eger energetıkalyq sýsyndardy 21 jasqa tolmaǵandarǵa satý faktileri anyqtalsa, Qazaqstan Respýblıkasynyń Ákimshilik quqyq buzýshylyq týraly kodeksiniń 199-baby boıynsha ákimshilik jaýapkershilik qarastyrylǵanyn eskertedi. Osy rette Túrkistan oblysynyń prokýratýrasy turǵyndardy zań talaptaryn oryndaýǵa shaqyrdy.
Buǵan deıin habarlaǵanymyzdaı, Qazaqstanda energetıkalyq sýsyndar aktsızdeletin taýarlar qataryna qosyldy.
