Túrkistan oblysynda eńbekke qatysty shaǵymdardyń 70 paıyzy bilim salasyna tıesili

TÚRKІSTAN. KAZINFORM — Túrkistan oblysynda ótken jyly 6 kásiporynda 4 890 qyzmetkerge qatysty 454,7 mln teńge kóleminde jalaqy qaryzy anyqtalǵan. Jyl qorytyndysy boıynsha bul qaryz tolyqtaı óndirildi.

Memlekettik eńbek ınspektsııasy komıteti Túrkistan oblysy boıynsha departamentiniń málimetinshe, qazirgi tańda 1 mekemeniń 101,2 mln teńge jalaqy qaryzy boıynsha mekeme basshysyna nusqamalar berilip, ákimshilik sharalar qoldanyldy.

— Ótken jyly departamentke 2 958 azamattan aryz-shaǵym tústi. Onyń 2 073-i qaralyp, 350 tekserý júrgizildi. Nátıjesinde 746 zań buzý anyqtaldy. Osyǵan baılanysty mekemelerge 35,3 mln teńge kóleminde aıyppul salynyp, onyń 31,5 mln teńgesi óndirildi. Túsken aryz-shaǵymdardyń 67 paıyzy memlekettik organdarǵa, 33 paıyzy jeke sektorǵa qatysty. Shaǵymdardyń 68 paıyzy bilim berý salasyna, 12 paıyzy densaýlyq saqtaý salasyna tıesili. Al memlekettik mekemelerge qatysty aryz-shaǵymdar 8 paıyzdy, áleýmettik sala 2 paıyzdy, ózge salalar 10 paıyzdy kórsetip otyr, — dedi departament basshysy Amangeldi Álish.

Sondaı-aq byltyr óndiristik jaraqattanýǵa baılanysty 104 habarlama tirkelgen.

Departament tarapynan tıisti tekserýler júrgizilip, eńbek qyzmetine baılanysty jazataıym oqıǵa retinde tergep-tekserýge jatpaıtyn 48 habarlama baqylaýdan alyndy. Esepti merzimde 50 óndiristik jazataıym oqıǵa bolǵan, saldarynan 57 adam jaraqattanyp, 8 adam qaza tapqan.

Aıta keteıik, buǵan buryn Túrkistan oblysynda 470-ke jýyq qurylys nysanynyń zań buzǵany týraly habarlanǵan.