Túrkistan oblysynda emhanaǵa kelgen naýqas dárigerdi pyshaqtady

Túrkistan oblysynda klınıkaǵa kelgen naýqas dárigerge pyshaq saldy.  Kazinform bul týraly Rolisia.kz-ke silteme jasap habarlaıdy. 

Polıtsııa málimetine súıensek, Saıram aýdanynyń Aqsýkent kentinde jeke klınıkada ýltradybystyq kabınetke kezekte turǵan patsıentterdiń biri janjal shyǵaryp, rentgenolog-dárigerge pyshaq salǵan.

«Jábirlenýshi aýrýhanaǵa jatqyzyldy. Oqıǵa ornyna jedel-tergeý toby dereý shyqty. QR Qylmystyq kodeksiniń 106-babynyń 2-bóligi "Densaýlyqqa qasaqana aýyr zııan keltirý" boıynsha qylmystyq is qozǵaldy.

Polıtsııa aýdannyń 27 jastaǵy turǵynyn kúdikti retinde ustady. Qazirgi ýaqytta ýaqytsha ustaý ızolıatoryna qamaldy. Bolǵan oqıǵanyń barlyq mán-jaıy anyqtalyp jatyr», - delingen aqparatta.