Túrkistan oblysynda emdelip jatqan sottalýshy aýrýhanadan qashyp ketti
TÚRKІSTAN. KAZINFORM — Túrkistan oblysynda medıtsınalyq mekemede emdelip jatqan sottalýshy aýrýhanadan qashyp ketti. Oqıǵa 23 qazanda bolǵan.
Túrkistan oblysy Polıtsııa departamentiniń habarlaýynsha, qazirgi tańda jasyrynǵan sottalýshynyń ornalasqan jerin anyqtaýǵa jáne ustaýǵa baǵyttalǵan jedel-izdestirý is-sharalary júrgizilip jatyr.
— Polıtsııanyń barlyq jeke quramy izdestirý jumystaryna jumyldyryldy. Baqylaý beketteri qoıylyp, qajetti shuǵyl sharalar atqarylyp jatyr. Oqıǵa boıynsha qyzmettik tergeý bastaldy, onyń qorytyndysymen barlyq kináli tulǵalarǵa qatysty qatań sharalar qabyldanady. Atalǵan jaıt Túrkistan oblysy Polıtsııa departamenti basshylyǵynyń jeke baqylaýynda, — delingen oblystyń PD resmı habarlamasynda.
Budan buryn Ulttyq neırohırýrgııa ortalyǵy otaǵa muqtaj sottalýshyny jatqyzýdan bas tartqany týraly jazǵan edik.