Túrkistan oblysynda elimizdegi eń iri ónerkásiptik jylyjaı kesheni iske qosyldy
TÚRKІSTAN.KAZINFORM - Túrkistan oblysy Keles aýdany Aqtóbe aýyl okrýgindegi 51 gektar aýmaqta jylyjaı kesheniniń qurylysy júrgizilip jatyr. Túrkistan oblysynyń ákimi Nuralhan Kósherov «Ecoculture-Eurasia» JShS quryltaıshysy Almas Daýytovty qabyldady.
Túrkistan oblysy ákiminiń baspasóz qyzmeti málimetinshe, kezdesýde taraptar jobany iske qosý jaıyn keńinen talqylap, atqarylyp jatqan jumystardy saralady.
– Keles aýdanynda júzege asyrylyp jatqan «Ecoculture-Eurasia» ónerkásiptik jylyjaı kesheni – óńirimizdiń agroónerkásiptik damýyna serpin beretin mańyzdy joba. Memleket basshysy Qasym-Jomart Toqaev azyq-túlik qaýipsizdigi ulttyq qaýipsizdiktiń mańyzdy bóligi ekenin birneshe ret atap ótti. Bul baǵytta otandyq aýyl sharýashylyǵy óndirisin damytý jáne ımportqa táýeldilikti azaıtý – memlekettiń negizgi basymdyqtarynyń biri. Osy turǵyda «Ecoculture-Eurasia» kompanııasynyń ónerkásiptik jylyjaı keshenin iske asyrý jobasynyń mańyzy erekshe. Joba aıasynda jylyna 25 myń tonnaǵa deıin qyzanaq ónimin óndirý arqyly óńir turǵyndaryn jyl boıy sapaly otandyq ónimmen qamtamasyz etýge, ishki naryqty turaqtandyrýǵa jáne eldiń azyq-túlik qaýipsizdigin nyǵaıtýǵa naqty úles qosylady. Jergilikti turǵyndardy oqytýǵa, kadrlardyń biliktiligin arttyrýǵa erekshe kóńil bólingenin atap ótkim keledi. Bul – áleýmettik jaýapkershiligi joǵary ári uzaq merzimdi damýǵa baǵyttalǵan kózqarastyń aıqyn kórinisi. Ákimdik tarapynan jobaǵa qajetti barlyq uıymdastyrýshylyq jáne ınfraqurylymdyq qoldaý kórsetiledi. Biz «Ecoculture-Eurasia» kompanııasymen ózara tıimdi, senimdi áriptestik ornaıtynyna senimdimiz, – dedi Nuralhan Oralbaıuly.
«Ecoculture-Eurasia» JShS quryltaıshysy jobany iske qosý boıynsha qarqyndy jumystar atqarylyp jatqanyn jetkizip, qazirgi jaǵdaıdy baıandady.
– Óńir qarqyndy damyp keledi. Biz júzege asyryp jatqan aýqymdy joba da aımaqtyń áleýmettik-ekonomıkalyq damýyna serpin beredi dep senemin. Qajetti ınfraqurylym tolyqtaı jetkizildi. Bul baǵytta kórsetilgen qoldaý úshin reseılik seriktesterimiz de rızashylyǵyn bildirýde. Jastardy Reseıge tájirıbe almasýǵa jiberý, sondaı-aq jergilikti turǵyndardy jyl boıy, ıaǵnı jyldyń tórt mezgilinde de turaqty jumyspen qamtý josparlanyp otyr. Sonymen qatar jylyjaı kesheniniń aýmaǵyn kezeń-kezeńimen 500 gektarǵa deıin ulǵaıtýdy kózdep otyrmyz, – dedi Almas Daýytov.
Oblys ákimi Keles aýdanynda shaǵyn óndiristik park qurylysy júrgizilip jatqanyn atap ótti. Atalǵan parkte ónimderdi qaptaý, óńdeý jáne konservileý tsehtaryn ashýǵa múmkindik bar ekenin jetkizdi. Bul óz kezeginde logıstıkalyq shyǵyndar edáýir qysqartyp, shaǵyn jáne orta bıznestiń damýyna serpin bereri sózsiz.
Jobany iske asyrýǵa 42 mlrd teńge ınvestıtsııa salynyp otyr. Jylyjaıda jylyna 25 000 tonna qyzanaq ósirilmek. Joba tolyq iske qosylǵanda, 800 jańa jumys orny ashylady. Jobany «Qazaqstannyń Damý banki» AQ tarapynan qarjylandyrý maquldanǵan.
2023 jyly 23,5 mlrd teńge mólsherinde qarajat bólingen. Jylyjaı tolyq Nıderland elinen alyp kelingen jabdyqtarmen jabdyqtalǵan. Búginde keshenniń 40 gektar aýmaǵynda jylyjaı bloktarynyń metall konstrýktsııalary ornatyldy.
Syrtqy jáne ishki jelileri boıynsha qurylys-montaj jumystary júrgizildi. Sonymen qatar ákimshilik-turmystyq kesheniniń ǵımaraty, materıaldyq-óndiristik qoımalary, baqylaý-ótkizý pýnktiniń qurylysy júrgizilip jatyr. Qazandyq jáne tótenshe janar-jaǵarmaı qoımasynyń qurylysy aıaqtaldy. 8 jylyjaı blogy jáne tehnıkalyq dáliz ornatylýda. Onyń 4 blogy men tehnıkalyq dálizi iske qosyldy. Keshenniń resmı ashylýy kóktemde ótedi dep josparlanyp otyr.
Aıta keteıik, ótken jyly jalpy jylyjaı kólemi 75 gektarǵa ósip, 1715 gektardy quraǵan. Bul jumystar óńirdiń atalǵan saladaǵy úlesin 76 paıyzǵa jetkizip otyr. 2025 jyly jylyjaılardan 150 myń tonnadan astam kókónis ónimi, 550 tonna banan, 3,2 myń tonna lımon men 13 myń tonna qulpynaı óndirildi.