Túrkistan oblysynda elektr eseptegishterin teksermegen eki kásiporynǵa aıyppul salyndy
TÚRKІSTAN. KAZINFORM – Tehnıkalyq retteý jáne metrologııa komıtetiniń Túrkistan oblysy boıynsha departamenti júrgizgen tekserý barysynda Qazaqstan Respýblıkasynyń «Ólshem birligin qamtamasyz etý týraly» zańnamasynyń talaptarynyń buzylǵany anyqtaldy.
Saýda jáne ıntegratsııa mınıstrliginiń málimetinshe, tekserý kezinde óńirdegi eki kommýnaldyq kásiporynnyń mindetti metrologııalyq tekserýden ótpegen baqylaý esepteý quraldaryn, onyń ishinde elektr eseptegishterin, ampermetrler men voltmetrlerdi paıdalanǵany belgili bolǵan.
Zańnamaǵa sáıkes, qyzmet kórsetýshi men tutynýshy arasyndaǵy esep aıyrysý kezinde, sondaı-aq óndiristegi qaýipsizdikti qamtamasyz etý maqsatynda qoldanylatyn barlyq aspaptarda qoldanystaǵy tekserý sertıfıkaty bolýy tıis. Tekserilmegen quraldardy paıdalaný tutyný kórsetkishteriniń burmalanýyna jáne elektr jelileriniń qaýipsizdigine qaýip tóndiredi.
Elektr ólshegish quraldardyń dáldigi tek tutynýshy túbirteginde kórsetiletin málimetterdiń durystyǵyna ǵana emes, sonymen qatar tehnıkalyq qaýipsizdiktiń saqtalýyna da áser etedi.
Departament ókilderiniń málimdeýinshe, «Voltmetrler men ampermetrlerdegi qatelikter elektr jelilerindegi júktemeni durys baǵalaýǵa kedergi jasap, avarııalyq jaǵdaılardyń týyndaý qaýpin arttyrady. Sonymen qatar, tekserilmegen eseptegishter tutynýshylardyń naqty resýrstardy tutyný týraly aqparat alý quqyǵyn buzady».
Tekserý nátıjesinde eki kommýnaldyq kásiporyn ákimshilik jaýapkershilikke tartylyp, olarǵa 3 892 500 teńge kóleminde aıyppul salyndy. Sonymen qatar, zańbuzýshylyqtardy joıýǵa qatysty nusqamalar berildi.
Aıta ketsek, budan buryn habarlaǵanymyzdaı, Qazaqstan І toqsanda elektr energııasy boıynsha profıtsıtke shyqty.
