Túrkistan oblysynda ekologııalyq zańnamany buzýdyń 73 deregi anyqtaldy
TÚRKІSTAN. KAZINFORM — Túrkistan oblysynda bıylǵy birinshi jartyjyldyqta qorshaǵan ortany qorǵaý salasynda 38 baqylaý is-sharasy ótkizildi. Tekserý qorytyndysy boıynsha 73 zań buzýshylyq anyqtaldy.
Túrkistan oblystyq ekologııa departamentiniń basshysy Baıbatyr Musabektiń aıtýynsha, anyqtalǵan zań buzýshylyqtar boıynsha 324 ákimshilik is qozǵalǵan.
— Nátıjesinde jalpy 64,8 mln teńge kóleminde ákimshilik aıyppul salyndy. Onyń 31,1 mln teńgesi 219 is boıynsha óndirildi. Qalǵan 31 aıyppuldy májbúrlep óndirý úshin ýákiletti organdarǵa joldandy, — dedi ol.
Sonymen qatar departament basshysy oblysta qatty turmystyq qaldyqtar polıgondarynyń órtenýi jáne ruqsatsyz qoqys oryndarynyń paıda bolýy ózekti máselelerdiń biri ekenin atap ótti.
Onyń aıtýynsha, bıyl óńirde polıgondardyń órtenýine baılanysty 6 derek tirkelgen. Budan bólek 5 qatty turmystyq qaldyqtar polıgonyna tekserý júrgizilip, 1,2 mln teńge kóleminde ákimshilik aıyppul salyndy.
Sondaı-aq «Taza Qazaqstan» ekologııalyq aktsııasy aıasynda ǵaryshtyq monıtorıng nátıjesinde oblys aýmaǵynda 250 ruqsatsyz qatty turmystyq qaldyqtar úıindisi anyqtaldy. Zańsyz qoqys oryndarynyń eń kóbi Ordabasy aýdanynda — 53, Arys qalasynda — 48 jáne Keles aýdanynda 37 fakti tirkelgen.
— Reıdtik is-sharalar barysynda 33 aýyldyq okrýg ákimdigi aýmaǵynda qoqys úıindilerin tazartý jumystarynyń tıisti deńgeıde júrgizilmegeni belgili boldy. Ǵaryshtyq túsirilimder nátıjesinde anyqtalǵan zań buzýshylyqtar boıynsha jalpy 12,6 mln teńgege 51 ákimshilik aıyppul salyndy. Búginde barlyq aıyppul tolyq kólemde óndirildi, — dedi spıker.
Buǵan deıin Túrkistan oblysynda tazalyq talaptaryn buzǵandarǵa 166 mln teńgeden astam aıyppul salynǵanyn jazǵan edik.
