Túrkistan oblysynda ekologııalyq mádenıetti qalyptastyrý jumystary júrgizilip jatyr
TÚRKІSTAN. KAZINFORM - Túrkistan oblysynda Memleket basshysy Qasym-Jomart Kemeluly Toqaevtyń bastamasymen qolǵa alynǵan «Taza Qazaqstan» jalpyulttyq jobasy aıasynda 6 404 tazalyq is-sharasy uıymdastyrylyp, 15 643 tonna qoqys shyǵaryldy.
Oblys ákimdigi is-shara josparyn bekitip, aýqymdy jumystardy júıeli túrde júzege asyryp keledi.
Oblys ákimi Nuralhan Kósherovtiń baqylaýymen óńirdiń barlyq aýdan-qalalardaǵy eldi mekenderde tazalyq jumystary, ruqsatsyz qoqys úıindilerin joıý, kósheler men qoǵamdyq oryndardy abattandyrý jáne kógaldandyrý boıynsha belsendi is-sharalar turaqty júrgizilip keledi. Aýdan-qalalarǵa kireberis aýmaqtar men turǵyn úılerdiń qasbetteri de abattandyrylyp jatyr.
Halyq arasynda ekologııalyq mádenıetti qalyptastyrý úshin jergilikti BAQ ókilderi eldi mekenderdi aralap, júrgizilip jatqan jumystar men ózekti máselelerdi telearnalar arqyly tikeleı kórsetip jatyr. Sonymen qatar, qoǵamdyq oryndarda jasyryn kameralarmen áleýmettik eksperımentter ótkizilip, turǵyndardyń qorshaǵan ortaǵa degen janashyrlyǵy zerttelýde.
Qorshaǵan ortany qorǵaý maqsatynda ákimdik pen quqyq qorǵaý organdary birlese otyryp, turaqty reıdtik is-sharalar uıymdastyryp keledi. Ótken jyly qoǵamdyq oryndardy lastap, zań buzǵan 26 702 tulǵaǵa 318,5 mln teńge kóleminde aıyppul salyndy. Al bıylǵy jyldyń 7 aıynda sanıtarlyq talaptardy saqtamaǵan 20 169 tulǵaǵa qatysty hattama toltyrylyp, 455 mln teńgeden astam aıyppul salyndy. Onyń ishinde 247 mln teńge óndirildi. Sonymen qatar, jergilikti atqarýshy organdar tarapynan 5 594 hattama toltyrylyp, 31 mln teńgege aıyppul salyndy. Zańbuzýshylyqtardyń aldyn alý maqsatynda túsindirý jáne profılaktıkalyq jumystar turaqty túrde júrgizilip keledi.
Baǵdarlama aıasynda byltyrǵy jyldyń 6 sáýirinen bastap kúndelikti tazalyq jumystary uıymdastyrylyp, bekitilgen kestege sáıkes oblys aýmaǵynda 807 is-shara sátti aıaqtaldy. 2024 jyly 2 240 is-shara júzege asyryldy. Bul jumystarǵa 300 myńnan astam turǵyn qatysyp, 1 500-den astam tehnıka jumyldyryldy. Nátıjesinde, 1 mıllıonnan astam aǵash otyrǵyzylyp, 3 389 tonna qoqys shyǵaryldy. Sonymen qatar, oblys kóleminde kópqabatty turǵyn úılerdiń qasbetterin retke keltirý jumystary júrgizilip, 120 úıge jóndeý jumystary atqaryldy.
Bıyl da óńirde tazalyq, abattandyrý jáne kógaldandyrý jumystary qarqyndy júrgizilip keledi. 2025 jylǵa arnalǵan josparǵa sáıkes oblys aýmaǵynda 7 263 tazalyq sharasy bekitilip, búgingi kúnge deıin 4 164 is-shara ótkizildi. Jyl basynan beri 732 myńnan astam turǵyn qatysyp, 4 352 arnaıy tehnıka jumyldyryldy. Nátıjesinde, 509 myńnan astam kóshet otyrǵyzylyp, 12 254 tonna qoqys shyǵaryldy.
Oblysta azamattarǵa abattandyrý, kógaldandyrý jáne aýmaqtardy sanıtarlyq tazalaý boıynsha ótinishterin jetkizýge múmkindik beretin Telegram-bot aqparattyq júıesi iske qosylǵan. Aýdan jáne qala ákimdikteriniń jedel mobıldik toptary túsken ótinishter boıynsha tıisti jumystardy der kezinde atqarýda. Byltyr Telegram-bot platformasyna 820 ótinim túsip, barlyǵy tolyq oryndalǵan. Al bıyl «TazaQazBot» júıesine 2 946 ótinim túsip, onyń 2 938-i oryndaldy, 8 ótinim oryndalý ústinde. Sonymen qatar, sanıtarlyq tazalyqty qamtamasyz etý maqsatynda kommýnaldyq mekemelerge arnaıy tehnıkalar satyp alynýda.
Atalǵan aktsııa aıasynda «Úlgili aýyl» baıqaýy uıymdastyrylyp, jeńimpaz aýyldar úshin jergilikti bıýdjet esebinen áleýmettik nysandar salynýda. Bul baıqaý oń tájirıbe retinde elimizdiń ózge óńirlerine de taralýda.
-Túrkistan oblysynyń ákimdigi «Taza Qazaqstan» jobasy – ýaqytsha aktsııa emes, azamattardyń qaýipsiz, qolaıly jáne taza ortada ómir súrýine baǵyttalǵan uzaq merzimdi strategııa ekenin atap ótedi. Barsha turǵyndardy ekologııalyq is-sharalarǵa belsendi qatysyp, óńirimizdiń jarqyn ári taza bolashaǵyna úles qosýǵa shaqyramyz!-delingen Túrkistan oblysy ákiminiń baspasóz qyzmeti taratqan aqparatta.
