Túrkistan oblysynda eki polıtseı tárkilengen esirtkini satyp jatqan jerinen ustaldy

TÚRKІSTAN. KAZINFORM – QR ІІM Ózindik qaýipsizdik departamenti men Túrkistan oblysy PD ÓQB birlesip, quqyqqa qaıshy áreket jasady degen kúdikpen Polıtsııa departamentiniń eki qyzmetkerin ustap, jaýapqa tartty. Bul oqıǵaǵa qatysty QR ІІM resmı ókili Shyńǵys Álekeshev túsinikteme berdi.

– Kúdiktilerdiń ekeýi de ustalyp, ýaqytsha ustaý ızolıatoryna qamaldy. Sotqa deıingi tergeý amaldary júrgizilip jatyr. Osy rette oblystyq Polıtsııa departamentinde tártiptik komıssııanyń otyrysy ótkizilip, onyń sheshimimen eki qyzmetker de teris sebeptermen jumystan shyǵaryldy, – dep atap ótti Sh.Alekeshev.

Sonymen qatar basqa da jaýapty laýazymdy tulǵalarǵa qatysty qyzmettik tekserý júrgizilip jatyr.

– Іshki ister mınıstri óz qatarymyzdy mundaı aram pıǵyldy qyzmetkerlerden turaqty negizde tazartý boıynsha júıeli jumystar júrgizilip otyratyny týraly birneshe ret atap ótken bolatyn. Antyn satatyn qyzmetkerlerge qarsy ózimizdiń prıntsıpti ustanymymyzdy málimdeımiz, – dedi resmı ókil.

Budan buryn Shymkentte esirtki boıynsha esepte turǵan 7 azamat medıtsınalyq tekserýden ótpegeni týraly jazǵan edik.