Túrkistan oblysynda gıdrotsıkl úrmeli qaıyqpen soqtyǵysyp, 3 adam aýrýhanaǵa jetkizildi

TÚRKІSTAN. KAZINFORM – Qazirgi tańda atalǵan fakti boıynsha sotqa deıingi tergeý júrgizilip jatyr. Sý kóligi aıypturaqqa qoıyldy. 

Qatty jyldamdyqpen kelgen gıdrotsıkl úrmeli qaıyqta otyrǵandardyń ústinen sekirip ótken. Oqıǵa saldarynan 3 adam zardap shekti. Olar jergilikti aýrýhanaǵa jetkizilip, qajetti em-dom qabyldady. 

«Bireýiniń bas mıy shaıqalǵan. Al, biriniń murny synǵan. Sondaı-aq deneleri syrylǵan. Barshasyna qajetti dárigerlik kómek kórsetildi. Jaraqattarynyń jeńil bolýyna baılanysty eki adam aýrýhanaǵa jatýdan bas tartty. Al, bireýi eki kún em alǵan soń, týystarynyń ótinishimen jergilikti jerdegi aýrýhanaǵa aýystyryldy», - dedi Shardara aýdandyq aýrýhanasy bas dárigeriniń emdeý isi jónindegi orynbasary Nurǵalı Moldahanov. 

Túrkistan oblysy polıtsııa departamentiniń baspasóz qyzmeti atalǵan oqıǵa boıynsha sotqa deıingi tergeý júrgizilip jatqanyn málimdedi. 

«Áleýmettik jelide jarııalanǵan beınejazbadaǵy oqıǵa 8 tamyz kúni Shardara sý qoımasyndaǵy demalys aýmaǵynda bolǵan. Gıdrotsıkldiń júrgizýshisi anyqtalyp, polıtsııaǵa jetkizildi. Osy fakti boıynsha sotqa deıingi tergeý júrgizilýde. Sý kóligi aıypturaqqa qoıyldy. Sondaı-aq demalýshylarǵa gıdrotsıkldi jalǵa bergen adamdardy jaýapkershilikke tartý boıynsha sharalar qabyldanýda», - delingen vedomstvo aqparatynda.