Túrkistan oblysynda eki aıda 7 keliden astam esirtki tárkilendi

TÚRKІSTAN. KAZINFORM — Oblysta 4 esirtki satý, 4 kontrabanda jáne 2 asa iri kólemde saqtaý faktisi tirkeldi. 

Túrkistan oblystyq polıtsııa departamentiniń málimetinshe, jyldyń alǵashqy eki aıynda óńirde esirtki qylmysy boıynsha 80-ge jýyq quqyq buzýshylyq anyqtalǵan.

— Onyń ishinde 10 qylmystyq jáne 68 ákimshilik quqyq buzýshylyq tirkeldi. Atap aıtqanda, 4 esirtki satý, 4 kontrabanda jáne 2 asa iri kólemde saqtaý deregi anyqtaldy. Zańsyz aınalymnan 7 keliden astam esirtki tárkilendi, basym bóligi — kannabıs ónimderi, — delingen resmı habarlamada.

Sondaı-aq profılaktıka baǵytynda 350-den astam túsindirý is-sharasy júrgizilip, 33 myńnan astam azamat qamtyldy.

— Internet keńistiginde júrgizilgen monıtorıng nátıjesinde 224 saıt buǵattalyp, «Antı-frod» júıesi arqyly 454 kúmándi bank kartasy anyqtaldy. Jedel-profılaktıkalyq jumystar barysynda 160 reıd ótkizilip, 235 esirtki jarnamasy joıyldy, — dep málimdedi vedomstvo.

Budan bólek, «Dármek» is-sharasy aıasynda 2 qylmystyq derek tirkelgen. Esirtki qoldanǵany úshin 235 quqyq buzýshylyq anyqtalyp, tıisti materıaldar sotqa joldandy.

Budan buryn habarlaǵandaı, Túrkistan oblysynda byltyr zańsyz aınalymnan bir tonnadan astam esirtki tárkilengen edi.