Túrkistan oblysynda egisti sýmen qamtamasyz etý máselesi qalaı sheshilip jatyr

Oblystyq aýyl sharýashylyǵy basqarmasynyń málimetinshe, bıyl óńirde 919 myń gektar alqapqa aýyl sharýashylyǵy daqyldaryn egý josparlanǵan. Bul ótken jylmen salystyrǵanda 8 myń gektarǵa artyq. Onyń ishinde 536 myń gektarǵa jazdyq, 208 myń gektarǵa kúzdik, al 175 myń gektarǵa mal azyqtyq daqyldar ornalastyrylady.

Aımaqtyń klımattyq erekshelikterine baılanysty kóktemgi dala jumystary qańtar aıynan bastalǵan. Qazirgi ýaqytta oblysta josparlanǵan 536 myń gektar alqapqa 92 myń gektar jazdyq daqyldar egildi.

— Ónim kólemin eki esege arttyrý jónindegi jol kartasy aıasynda bıyl birqatar daqyldardyń egis kólemi ulǵaıtylady. Máselen, maqta 17 myń gektarǵa, júgeri 15 myń gektarǵa, maqsary 16 myń gektarǵa artady. Al sý shyǵynyn azaıtý úshin kúrish alqaby 7 myń gektarǵa qysqartylyp, 3,5 myń gektar shamasynda bolady, — dedi oblystyq aýyl sharýashylyǵy basqarmasy basshysynyń orynbasary Álibek Plalov.

Óńirde jyl saıyn sý jetkizý máselesi ózekti. Bıyl aýyl sharýashylyǵy daqyldaryna qajetti aǵyn sý lımıti 3,8 mlrd tekshe metr bolyp belgilengen. Bul ótken jylmen salystyrǵanda 200 mln tekshe metrge az.

— Oblys aýmaǵynda jalpy syıymdylyǵy 8,8 mlrd tekshe metr bolatyn 42 sý qoımasy bar. Qazirgi tańda sý qoımalarynda jınalǵan sý kólemi normatıvtik deńgeıde, ıaǵnı 87 paıyzdy quraıdy. Negizgi Shardara sý qoımasy 100 paıyzǵa tolǵan. Al Bógen jáne Qosqorǵan sý qoımalarynyń tolýy 99 paıyzǵa jetken. Qalǵan sý qoımalaryn vegetatsııalyq kezeń bastalǵanǵa deıin jaýyn-shashyndy eskere otyryp tolyqtyrý múmkindigi bar, — dedi spıker.

Budan bólek, óńirde 50 myń gektar alqapta sý únemdeý tehnologııalary engizilmek. Sonyń nátıjesinde bul tásilder qoldanylatyn jer kólemi 164 myń gektarǵa jetip, 280,6 mln tekshe metr sý únemdelmek.

Vedomstvo málimetinshe, kóktemgi egis jumystaryna qajetti janar-jaǵarmaı, qarjylyq qoldaý jáne mıneraldy tyńaıtqyshtar ýaqytyly bólinip jatyr. Qajetti qor jetkilikti.

— Kóktemgi dala jumystaryna 52,5 myń tonna jeńildetilgen janar-jaǵarmaı bólindi. Bosatý baǵasy lıtrine — 281 teńge. Bul naryqtyq baǵadan 15 paıyzǵa arzan, — dedi Álibek Plalov.

Budan buryn 3 myńǵa jýyq fermer kóktemgi egis jumystaryna qarjy alǵanyn jazǵan edik.