Túrkistan oblysynda dúnıege kelgen úshemderge Muhammed, Mahmud, Ahmet esimderi qoıyldy
TÚRKІSTAN.KAZINFORM- Oblys ákimi úshem bosanǵan anaǵa qurmet kórsetti.
11 aqpan kúni Túrkistan qalasynyń turǵyny Uldar Mombekova úshemdi dúnıege ákeldi. Sábıdiń úsheýi de ul bala. Olarǵa Muhammed, Mahmud, Ahmet esimderi qoıyldy. Salmaqtary – 2010, 1950 jáne 2050 gramm. Náresteler merziminen buryn dúnıege kelgendikten alǵashqy kúnderi tıisti apparatta boldy. Tekserý, emdeý, kútip-baptaý jumystary tolyǵymen júrgizildi. Qazirgi tańda anasy men sábılerdiń jaǵdaıy jaqsy, úıge shyǵarý josparlanyp otyr.
Altyn qursaqty ana joldasy Samat Kokenovpen otbasyn qurǵandaryna 14 jyl bolǵan. Búginde 7 balanyń anasy. Úsh qyz ben bir uldyń qatary úsh batyrmen tolyǵyp otyr.
8 naýryz – Halyqaralyq áıelder kúnine oraı Túrkistan oblysynyń ákimi Nuralhan Kósherov Túrkistan oblysynyń №3 perınataldyq ortalyǵyna arnaıy baryp, úshemdi dúnıege ákelgen batyr anany merekemen quttyqtap, syı qurmet kórsetti.
– Túrkistan oblysy – kópbalaly analarymen maqtanatyn óńir. Oblysymyzda demografııalyq ósim óte jaqsy. Respýblıkamyzdaǵy árbir jetinshi sábı dúnıege keletin aımaǵymyzda byltyr 50 myń bala ómir esigin ashty. Oblys ortalyǵynda halyq sany joǵary qarqynmen ósýde. Ózderińizdeı otbasylar, batyr analar kóp bolyp, urpaq kóbeıe bersin. Qurmetimiz joǵary, – dedi Nuralhan Kósherov.
Aıta keteıik, ótken jyly Túrkistan oblysynda 11 úshem, 260 egiz ómirge keldi. Aımaqta 185 myńnan asa kópbalaly ana bar. Onyń ishinde, 18 myńnan asa «Altyn alqa», 43 myńnan asa «Kúmis alqa» ıegeri sanaly urpaq ósirýde.
Eske salaıyq, budan buryn Shymkentte eki jastaǵy balanyń baýyrynan kısta alynǵanyn jazǵan bolatynbyz.