Túrkistan oblysynda Domalaq ana kesenesindegi shyraqshylar sot sheshimimen májbúrlep shyǵarylady
TÚRKІSTAN. KAZINFORM — Túrkistan oblysy Báıdibek aýdanyndaǵy Domalaq ana kesenesi aýmaǵynda bolǵan daýly jaǵdaıǵa qatysty áleýmettik jelide vıdeo tarady.
Beınejazbadan belgisiz adamdardyń kesene esigin buzýǵa áreket jasap jatqanyn kórýge bolady.
Osyǵan baılanysty Kazinform tilshisine Báıdibek aýdany ákimdigi resmı túsinik berdi.
Vedomstvo málimetinshe, áleýmettik jelide taraǵan Domalaq ana kesenesi mańyndaǵy oqıǵa 27 naýryz kúni túsirilgen. Týrısterdiń Atyraý oblysynan arnaıy kelip, kesenege kire almaı turǵany anyqtalǵan.
Belgili bolǵandaı, atalǵan daý sottyń kesene shyraqshylaryn májbúrlep shyǵarý týraly sheshimine baılanysty týyndaǵan.
— Domalaq ana kesenesi jáne oǵan tıesili jer ýchaskesi Báıdibek aýdandyq turǵyn úı-kommýnaldyq sharýashylyq jolaýshylar kóligi jáne avtomobıl joldary bóliminiń «Jasyl saıabaqtar» KMM teńgeriminde tur. Túrkistan oblysynyń Mamandandyrylǵan aýdanaralyq ekonomıkalyq soty 2025 jyly aqpan jáne qazan aılarynda kesene shyraqshylary Sáttigúl Dáýletova men Qurmanbek Dáýletovke qatysty májbúrlep shyǵarý týraly sheshim shyǵarǵan, — delingen aýdan ákimdiginiń aqparatynda.
Ákimdiktiń habarlaýynsha, 2026 jylǵy 27 naýryzda sot sheshimin oryndaý maqsatynda sot oryndaýshysy A.Begalıev, aýdan ákiminiń orynbasarlary, tıisti bólim, mekeme basshylarynyń qatysýymen túsindirme jumystary júrgizilgen.
Alaıda shyraqshylar tarapynan kesene esikterine qulyp salynyp, týrısterdiń kesenege kirýine kedergi keltirilgen.
— Olarǵa teris áreketteri úshin qoldanystaǵy zańnamaǵa sáıkes jaýapkershilik qarastyrylǵany týraly eskertý jasaldy. «Jasyl saıabaqtar» mekemesi tarapynan sot sheshimin tolyq oryndaý baǵytyndaǵy jumystar jalǵasady, — dep málimdedi vedomstvo.
Budan buryn Túrkistanda 40-qa jýyq kásipkerdiń demalys aımaqtary salynǵan jerleri daýǵa qalǵanyn jazǵan edik.
