Túrkistan oblysynda dıqandar maqtanyń ornyna kúrish ekken

ASTANA. KAZINFORM — Túrkistan oblysynda «Qazsýshar» fılıalynyń kelisiminsiz ylǵaldy kóp qajet etetin daqyldarǵa kóshýdiń 203 deregin anyqtady. Bul týraly Sý resýrstary jáne ırrıgatsııa mınıstrliginiń baspasóz qyzmeti habarlady. 

Barlyq jaǵdaıda dıqandar maqtanyń ornyna kúrish ekken.

— Jetisaı aýdanynda 66 sharýa qojalyǵy 1079 gektar jerge ósiriletin daqyl túrin óz betinshe aýystyrǵan. Al Maqtaaral aýdanynda 137 sharýa qojalyǵy 1128 gektar alqapta daqyldardy ózdiginen almastyrǵan, — delingen mınıstrlik habarlamasynda.

Bul óz kezeginde óńirdegi sý resýrstaryna qosymsha júkteme túsirip, zańsyz sý alý qaýpin arttyrady.

Qazirgi ýaqytta barlyq zań buzǵan sharýalar «Qazsýshardyń» Túrkistan oblysyndaǵy fılıalymen sý jetkizý týraly qosymsha kelisimderge qol qoıdy.

— Bul kelisimderde olar ylǵaldy kóp qajet etetin daqyldardyń egis kólemin qysqartý sharalary týraly habardar bolǵandaryn jáne sý tapshylyǵy týyndaýy múmkin ekenin bilgenderin kórsetken. Degenmen olar kúrish egý úshin ózderine jaýapkershilik alyp, óńirdegi sý resýrstary tapshylyǵy jaǵdaıynda kúrishti sýarýǵa qajetti kólemde sýdyń berilmeýine daıyn bolǵan, — delingen Sý resýrstary jáne ırrıgatsııa mınıstrligi habarlamasynda.

Aıta ketelik Úkimet Qyzylorda oblysyndaǵy egin alqaptaryn sýmen qamtýǵa 1 mlrd teńge bóldi.