Túrkistan oblysynda dárilik ósimdik qazǵan sheteldikter ustaldy
TÚRKІSTAN. KAZINFORM – Túrkistan oblysynda dárilik ósimdik «keýrek» jınap júrgen shetel azamattary anyqtaldy. Zańsyz áreketter Arys qalasyna qarasty Montaıtas jáne Qojatoǵaı aýyldyq okrýgteriniń dalaly aımaqtarynda tirkeldi.
Tabıǵı resýrstar jáne tabıǵat paıdalanýdy retteý basqarmasy, Tabıǵat qorǵaý prokýratýrasy, oblystyq polıtsııa jáne Arys qalalyq ákimdigi mamandarynan quralǵan jumys toby arnaıy reıd uıymdastyrǵan.
Tekserý barysynda shekarany zańsyz kesip ótken úsh sheteldik shatyr tigip, qazan-oshaq daıyndap, keýrek ósimdigin qazýǵa tolyq daıyndalǵany belgili boldy.
- Bul áreketter zańsyz bolyp tabylady. Jaıylymdyq jerdiń ıesine qatysty tıisti akt toltyrylsa, shetel azamattary Arys aýdandyq polıtsııa bólimine tapsyryldy. Olar zań sheńberinde jaýapqa tartylady, - delingen Túrkistan oblysy ákimdiginiń aqparatynda.
Arys qalalyq Jer qatynastary bólimi jaıylymdyq alqaptardy zańsyz qazý nemese búldirý zańmen qatań jazalanatynyn eskertedi. Al, ákimdik ókilderi bul baǵyttaǵy baqylaý men reıdtik sharalar jalǵasatynyn habarlady.
Aıta keteıik, budan buryn Túrkistan oblysynda qýańshylyq saldarynan egistik kúıip, mal azyǵy qymbattaǵanyn jazǵan bolatynbyz.