Túrkistan oblysynda dárigerlerdi májbúrlep aqysyz demalysqa shyǵarǵany ras pa

TÚRKІSTAN. KAZINFORM – Áleýmettik jelide Túrkistan oblysyna qarasty Tólebı aýdanynda dárigerlerdi májbúrlep aqysyz demalysqa shyǵaryp jatqany týraly habarlama tarady.

Habarlama avtorynyń sózinshe, epıdemııalyq maýsymnyń qyzǵan shaǵynda, tirkelýden bastap kireberiske deıin kezek sozylyp turǵan Tólebı aýdandyq aýrýhanasynda (Kóksáıek aýyly) kenetten qyzmetkerlerdi jappaı aqysyz demalysqa jiberý týraly sheshim qabyldanǵan.

Osyǵan qatysty Kazinform tilshisine Túrkistan oblystyq densaýlyq saqtaý basqarmasy resmı túsinik berdi.

– Áleýmettik jelide taraǵan málimetke sáıkes, jergilikti kásipodaq ókilderiniń qatysýmen ujym arasynda aqysyz demalysqa shyǵý tártibi qaıta túsindirildi. Tólebı aýdandyq aýrýhanasynda aqysyz demalysqa shyǵý tártibi Qazaqstan Respýblıkasy Eńbek kodeksiniń 97-babyna sáıkes júzege asyrylady jáne arnaıy ishki buıryqpen bekitilgen. Ol buıryqpen aılyq esepteý tabeline jaýapty medıtsına qyzmetkerleri tanysyp, qol qoıǵan, basqa qyzmetkerlerge de tanystyrylǵan, – delingen basqarmanyń bizge usynǵan jaýabynda.

Vedomstvonyń málimetinshe, Tólebı aýdandyq aýrýhanasynda 130 dáriger, 516 meıirbıke, 153 tazalyqshy jáne budan basqa 143 qyzmetker jumys isteıdi. Osynyń ishinde jeke basyna jáne otbasy máselesine qatysty qarasha aıynda 11 dáriger (8,5%), 26 meıirbıke (5%) jáne 7 tazalyqshy (4,6%) aqysyz demalys alǵan, al jeltoqsan aıyna 4 dáriger jáne 2 meıirbıke aqysyz demalys alýǵa ótinish bildirgen.

Budan buryn Túrkistan qalasynda 500 oryndyq tergeý ızolıatory salynatynyn jazǵan edik.