Túrkistan oblysynda bıýdjet qarajatyn jymqyrý belgilerimen 6 tergep-tekserý isi tirkeldi
Túrkistan oblysynda bıýdjet qarajatyn jymqyrý belgilerimen sotqa deıingi 6 tergep-tekserý isi tirkeldi. Bul týraly Qazaqstan Respýblıkasy Sybaılas jemqorlyqqa qarsy is-qımyl agenttiginiń Túrkistan oblysy boıynsha departamentiniń basshysy Murat Tóleýbaev málimdedi, dep habarlaıdy QazAqparat tilshisi.
Sybaılas jemqorlyq táýekelderine júrgizilgen syrtqy taldaý jáne monıtorıng jumystary barysynda bıýdjet qarajatyn tıimsiz jumsaǵan memlekettik organdar anyqtalǵan. Máselen, bilim berý salasynda jalpy 25 mln teńge qarjy zańsyz aýdarylǵan. Al, Túrkistan qalalyq bilim bólimi 13,2 mln teńge, Jetisaı aýdandyq bilim bólimi 11,1 mln teńgegi bıýdjetke keri qaıtarǵan. Sondaı-aq, 437,7 mln teńge bolatyn bıýdjet qarajatyn jymqyrý belgilerimen sotqa deıingi 6 tergep-tekserý isi tirkelip otyr.
«Taldaý nátıjesimen berilgen usynymdar negizinde, Bilim basqarmasy bilim berý obektileri boıynsha bıýdjettiń negizsiz qalyptastyrǵan 22,6 mlrd teńgesin qysqartty. Únemdelgen qarjy birinshi kezektegi Úkimetten berilgen tapsyrmalardy oryndaýǵa baǵyttaldy. Bul qarjy balalardyń qaýipsizdigin qamtamasyz etý, 1-4 synyp oqýshylaryn tamaqtandyrý, jylytý júıesin gazǵa kóshirý, mektep partalaryn, taqtalardy, mektepke deıingi uıymdarǵa jıhaz satyp alý jáne bilim berý mekemelerin jóndeý jumystaryna joldandy» - dedi Murat Tóleýbaev.
