Túrkistan oblysynda búldirshinniń qoly ettartqyshqa qysylyp qaldy
TÚRKІSTAN. KAZINFORM — Tólebı aýdanynan jetkizilgen nebári bir jarym jastaǵy balaqaıdyń qoly ettartqyshqa qysylyp, aýyr jaraqat alǵan.
Jaraqat saldarynan búldirshin es-tússiz kúıde, travmatıkalyq shokpen jansaqtaý bólimine tústi. Dáriger-hırýrgterdiń shuǵyl sheshimi men kásibı sheberliginiń arqasynda der kezinde ota jasalyp, alǵashqy kómek kórsetildi.
— Qazirgi tańda balanyń jaǵdaıy turaqty, oń ózgerister baıqalyp otyr. Ázirge ol jansaqtaý bóliminde dárigerlerdiń jiti baqylaýynda, — delingen Túrkistan oblysy densaýlyq saqtaý basqarmasy usynǵan aqparatta.
Mamandar mundaı oqıǵalar ata-analarǵa úlken sabaq bolýy tıis ekenin eskertedi. Balalardyń qaýipsizdigin qamtamasyz etý — árbir eresektiń basty mindeti. Ásirese turmystyq tehnıka men ótkir quraldarǵa qatysty saqtyq sharalarynyń mańyzy zor.
Túrkistan oblystyq densaýlyq saqtaý basqarmasy ata-analardy balalardy qaraýsyz qaldyrmaýǵa jáne qaýipsizdik erejelerin qatań ustanýǵa shaqyrady.
Aıta keteıik, budan buryn Semeıde káriz qudyǵyna túsken eki jumysshy esinen tanyp qalǵanyn jazǵan bolatynbyz.