Túrkistan oblysynda búgin de kún qatty ysıdy

TÚRKІSTAN. KAZINFORM – Óńirde qan qysymy kóterilip, jedel járdem shaqyrtýshylar kóbeıgen.

Túrkistan oblysynda kún raıy qatty ysyp ketti. Óńirde shilde aıynda bolatyn aptap ystyq tur.

«Qazgıdromet» málimetine súıensek, eń joǵary temperatýra keshe tirkelgen. Atap aıtqanda, Otyrar aýdanyna qarasty Qyzylqum aýylynda aýa temperatýrasy 44 gradýsqa jetse, Sozaqta – 41, Túrkistan men Arysta – 42, al Jetisaıda – 40 gradýsty kórsetken. Mamandar aptap ystyq búgin de saqtalatyndyǵyn eskertti.

– Erteń jańbyr jaýyp, ystyqtyń beti qaıtady. Jalpy óńirde aýa raıy 23–28 gradýsqa, al taýly aımaqtarda 20 gradýsqa deıin tómendeıdi. Ótkinshi jańbyr jaýyp, jel men daýyl turýy múmkin. Alaıda 19 mamyrdan bastap kún qaıtadan ysyp, temperatýra joǵarylaı bastaıdy, – dedi «Qazgıdromet» mamandary.

Kúnniń qubylýy turǵyndardyń densaýlyǵyna da áser etip jatyr. Oblys aýmaǵynda qan qysymynyń kóterilýine baılanysty jedel járdem shaqyrtýlary kóbeıgen. Sáýir aıynyń alǵashqy 15 kúninde shamamen 5000 shaqyrtý tirkelse, mamyrdyń dál osy merziminde bul kórsetkish 5499-ǵa jetken.

Dárigerler turǵyndardy densaýlyǵyna muqııat bolýǵa, salqyn jerde kóp bolýǵa jáne jetkilikti mólsherde sý ishýge shaqyrady.

Aıta keteıik, budan buryn Túrkistan oblysynda aptap ystyq shegirtkelerdiń belsendiligin arttyrǵanyn jazǵan bolatynbyz.