Túrkistan oblysynda birneshe jyl bos turǵan týbdıspanser ǵımaratyna qaı mekeme ornalasady
TÚRKІSTAN. KAZINFORM – Túrkistan oblysy Otyrar aýdandyq týberkýlezge qarsy dıspanseriniń ǵımaraty birneshe jyldan beri bos turǵan.
Atalǵan nysannyń qurylysy 2005 jyly bastalyp, 2009 jyly paıdalanýǵa berilgen. Ǵımarat 60 orynǵa arnalǵan. Jergilikti turǵyndardyń aıtýynsha, eki qabatty ǵımarattyń paıdalanylmaı turǵanyna 10 jylǵa jýyq ýaqyt bolǵan.
Osyǵan baılanysty Kazinform tilshisine Túrkistan oblysy Densaýlyq saqtaý basqarmasy resmı túsinik berdi.
– Otyrar aýdandyq týberkýlezge qarsy dıspanseri 2016 jyly oblystyq týberkýlezge qarsy dıspanseriniń quramyna engizildi. Al 2018 jyly Otyrar aýdandyq ortalyq aýrýhanasynyń teńgerimine ótti. 2022 jyldyń naýryz aıynan bastap oblystyq jumyspen qamtýdy úılestirý jáne áleýmettik baǵdarlamalar basqarmasynyń «№1 Túrkistan arnaýly áleýmettik qyzmetter kórsetý ortalyǵy» KMM teńgerimine berildi, – delingen basqarma jaýabynda.
Vedomstvo málimetinshe, týberkýlezge qarsy dıspanser Otyrar aýdandyq ortalyq aýrýhanasynyń quramynda bolǵan kezeńde nysan tolyq zalalsyzdandyrylǵan. Oblystyq Jumyspen qamtýdy úılestirý jáne áleýmettik baǵdarlamalar basqarmasynyń habarlaýynsha, ǵımaratta 2024-2025 jyldary kúrdeli jóndeý jumystary júrgizilgen.
– Qazir jóndeý jumystary aıaqtalyp, nysan jańadan qurylǵan «№5 Otyrar arnaýly áleýmettik qyzmetter kórsetý ortalyǵy» KMM teńgerimine ótkizildi, – delingen vedomstvo aqparatynda.
Budan buryn Túrkistan qalasynda 2020 jyly qurylysy bastalǵan 570 oryndyq kópbeıindi aýrýhananyń qashan paıdalanýǵa beriletini týraly jazǵan edik.
