Túrkistan oblysynda birneshe kólik «Gazeldi» qyspaqqa aldy: úsh kúdikti ustaldy
TÚRKІSTAN. KAZINFORM – Túrkistan oblysynda «Gazel» júk kóligin birneshe kólikpen qýyp, shabýyl jasalǵany týraly vıdeo áleýmettik jelide tarady.
Beınejazbada birneshe kóliktiń «Gazeldiń» jolyn bógep, qyspaqqa alǵany kórinedi. Júk kóligindegiler ózderin memlekettik tirkeý nómirleri joq kólikterdiń qýyp kele jatqanyn aıtyp, kómek suraǵan.
Oqıǵaǵa qatysty Túrkistan oblysynyń Polıtsııa departamenti túsinik berdi.
Vedomstvo málimetinshe, joldaǵy buzaqylyq Ordabasy aýdanyna qarasty Badam eldimekeninde bolǵan. Osy derek boıynsha qylmystyq is qozǵalyp, úsh kúdikti ustaldy. Olar ýaqytsha ustaý ızolıatoryna qamaldy.
– Qazirgi ýaqytta oqıǵanyń barlyq mán-jaıy, onyń ishinde avtokólikke zaqym keltirý jáne jolaýshylardyń birine dene jaraqatyn salý derekteri anyqtalyp jatyr, – delingen polıtsııa habarlamasynda.
Polıtsııa quqyqqa qaıshy áreketterge zań aıasynda baǵa berilip, kináliler jaýapqa tartylatynyn málimdedi.
Buǵan deıin Almatyda joldaǵy janjal kezinde júrgizýshini urǵan kúdikti ustalǵanyn jazǵan edik.
