Túrkistan oblysynda bir jyl buryn jóndelgen jol ýchaskesi qaıta búlindi
TÚRKІSTAN. KAZINFORM – Arys qalasy aýmaǵynan ótetin oblystyq mańyzy bar «Arys – Montaıtas» avtomobıl jolynyń aqaýly bóligi ótken jyly jóndelgen. Alaıda arada bir jylǵa jeter-jetpes ýaqyt ótkende atalǵan ýchaske qaıta búlindi.
Jergilikti turǵyndardyń aıtýynsha, táýligine júzdegen júk kóligi, aýylaralyq avtobýstar men jedel járdem kólikteri qatynaıtyn bul mańyzdy joldyń qazirgi jaǵdaıy qaýip tóndirip otyr. Júrgizýshiler joldaǵy oıyqtardy aınalyp ótý úshin qarsy qozǵalys jolaǵyna shyǵýǵa májbúr.
– Ásirese Shaǵyr eldimekeninen shyǵaberistegi jol ýchaskesiniń qazirgi jaı-kúıi alańdatady. Jóndeý júrgizilgenine bir jylǵa da jetpeı, asfalt jabynynyń keı tustary opyrylyp, oıyqtar paıda boldy. Saldarynan jol qaıtadan jaramsyz kúıge túse bastady, – deıdi turǵyndar.
Túrkistan oblysy jolaýshylar kóligi jáne avtomobıl joldary basqarmasynyń málimetinshe, «Arys – Montaıtas» (KH-92) avtomobıl jolynyń 31-39,2 shaqyrymyndaǵy ortasha jóndeý jumystary 2019 jyldyń tamyz aıynda bastalǵan. Jobaǵa tapsyrys berýshi – oblystyq jolaýshylar kóligi jáne avtomobıl joldary basqarmasy, merdiger – «Seıser» JShS.
Jóndeý jumystary aıasynda eski asfalt jabyny alynyp, eki qabat asfalt tóselgen. Atalǵan jol 2020 jylǵy shildede paıdalanýǵa berilgen.
Vedomstvonyń dereginshe, ótken jyly avtomobıl jolynyń 37-39,2 shaqyrym aralyǵyndaǵy aqaýly bóligi jóndelgen. Alaıda qazirgi tańda jol jabynynyń búlinýine birneshe faktor áser etip otyr.
– Bul ýchaskede jerasty sýlarynyń jaqyn ornalasýy jáne Arys qalasy mańyndaǵy karerlerden qatynaıtyn shamadan tys aýyr júk kólikteriniń úzdiksiz qozǵalysy joldyń júris bóligin zaqymdap otyr. Basqarmaǵa qarasty «Ońtústik joldary» MKK mamandary tarapynan atalǵan jol ýchaskesine zerdeleý júrgizilip, aqaý aktisi túzildi. Oblystyq mańyzy bar avtomobıl joldaryn kútip-ustaý jumystary aıasynda zaqymdanǵan ýchaskelerdi qalpyna keltirý josparlanyp otyr, – dep habarlady oblystyq jolaýshylar kóligi jáne avtomobıl joldary basqarmasy.
Buǵan deıin Túrkistan oblysyndaǵy «Batys Eýropa – Batys Qytaı» halyqaralyq avtomagıstraline balama jol qurylysynyń merziminen keshigip jatqany týraly habarlaǵan edik.
