Túrkistan oblysynda bir táýlikte nómirsiz júrgen 50-ge jýyq kólik anyqtaldy
TÚRKІSTAN. KAZINFORM – Reıd barysynda keıbir júrgizýshiler polıtsııanyń zańdy talabyna baǵynbaı, jyldamdyqty asyryp, qashýǵa tyrysqan.
Túrkistan oblysynda tártip saqshylary memlekettik tirkeý nómirinsiz nemese jalǵan nómirmen júrgen 50-ge jýyq júrgizýshini anyqtady.
Oblystyq Polıtsııa departamentiniń Patrýldik polıtsııa batalony qyzmetkerleri respýblıkalyq mańyzy bar avtojoldarda kúmándi kólikterdi toqtatyp, qujattaryn teksergen.
Reıd barysynda keıbir júrgizýshilerdiń polıtsııanyń zańdy talabyna baǵynbaı, jyldamdyqty asyryp, qashýǵa árekettengeni belgili boldy. Alaıda polıtseılerdiń jedel is-qımylynyń arqasynda olardyń zańsyz áreketterine der kezinde tosqaýyl qoıyldy.
– Nátıjesinde 1 táýlikte memlekettik tirkeý belgisin ádeıi alyp tastaǵan nemese jalǵan nómir paıdalanǵan Changan, Toyota, BMW, Hyundai Palisade, Cadillac Escalade, Lixiang L9 markaly 50-ge jýyq avtokólik anyqtaldy. Barlyq derek boıynsha zańǵa sáıkes ákimshilik sharalar qabyldandy, - dep habarlady oblystyq polıtsııa departamenti.
Polıtseıler mundaı reıdtik is-sharalar aldaǵy ýaqytta da jalǵasatynyn atap ótti. Sondaı-aq júrgizýshilerge jol qozǵalysy erejelerin qatań saqtaý qajettigin eskertti.
Budan buryn Túrkistanda tólenbegen 18 aıyppuly bar júrgizýshi jalǵan nómirmen ustalǵanyn jazǵan edik.
