Túrkistan oblysynda bir otbasynan jeti adam ıis tıip ýlandy
TÚRKІSTAN. KAZIFORM – Zardap shekkenderdi dáriger qarap, densaýlyq jaǵdaılary turaqty bolǵan soń úılerine jiberdi. Úı ıesi ákimshilik jaýapqa tartyldy.
Oqıǵa Túrkistan oblysy Saryaǵash aýdanyna qarasty Aqjar aýyly, Máńgilik kóshesinde ornalasqan úıde bolǵan.
Tótenshe jaǵdaılar qyzmetiniń málimetinshe, oqys oqıǵaǵa úıdegi jylytý peshiniń aqaýy sebep bolǵan. Peshke tastalǵan zattar men kómir tútini úı ishine tarap, turǵyndar ýlanyp qalǵan.
Úıde jeti adam turyp jatqan, olardyń beseýi bala. Zardap shekkenderdiń barlyǵyna kómek kórsetildi. Olardyń jaǵdaıy qalypty.
Órt qaýipsizdigi talaptaryn buzǵany úshin úı ıesi Ákimshilik quqyqbuzýshylyq týraly kodekstiń 410-baby boıynsha jaýapqa tartyldy.
– Mundaı jaǵdaı kez kelgen úıde bolýy múmkin. Sol sebepti jylytý maýsymynda peshter men tútin júretin qubyrlardyń jumysyn turaqty túrde tekserip turý kerek. Aqaý baıqalsa, óz betińizshe jóndeýge tyryspaı, mindetti túrde mamandarǵa júginińiz. Úı-jaılarda ýly gazdyń bar-joǵyn anyqtaıtyn datchık bolǵany jón. Árqaısyńyzdyń qaýipsizdigińiz biz úshin mańyzdy. Osy oqıǵadan sabaq alyp, órt qaýipsizdigi erejelerin qatań saqtaýdy suraımyz, – dedi Túrkistan oblysy TJD memlekettik órt baqylaý basqarmasynyń mindetin atqarýshy, azamattyq qorǵaý maıory Jasulan Aınabek.
Eske salaıyq, 18 qarashada Túrkistan oblysy Jetisaı aýdanynyń Alǵabas aýylynda eki qabatty úı órtenip, oqıǵa ornynan 12 adamnyń máıiti tabyldy.