Túrkistan oblysyndaǵy jarylys: eki balanyń anasy mert boldy

TÚRKІSTAN. KAZINFORM – 30 qazan kúni Túrkistan oblysy Otyrar aýdany Sháýildir aýylyndaǵy kóppáterli turǵyn úılerdiń birinde gaz jarylysy bolǵan edi.

Oqıǵa kezinde zardap shekken 35 jastaǵy áıeldiń jaraqaty tym aýyr bolyp, dárigerler onyń ómirin saqtap qala almady. Naýqas aýyr kúıik jaraqatyn alǵan.

Otyrar aýdandyq aýrýhanasyna túsken sátten bastap mamandar qashyqtyqtan konsýltatsııalar ótkizip, naýqastyń jaǵdaıyn jaqsartýǵa kúsh salǵan. Bilikti mamandandyrylǵan medıtsınalyq kómek alý úshin Shymkentke jetkizilgen.

- 3 qarasha kúni saǵat 15:30-da Orynbaev atyndaǵy gıperbarııalyq oksıgenatsııa ortalyǵyna Túrkistan oblysy Otyrar aýdandyq ortalyq aýrýhanasynan 1990 jyly týǵan áıel óte aýyr jaǵdaıda aýystyryldy, - dedi Orynbaev atyndaǵy gıperbarııalyq oksıgenatsııa ortalyǵynyń bas dárigeri Madına Ermahanbetova.

Bas dárigerdiń aıtýynsha, jaǵdaıdyń aýyrlyǵy polıtravma men aýyr aralas jaraqatqa baılanysty bolǵan. Qabyldaý kezinde zardap shekken adamnyń jaǵdaıy óte aýyr dep baǵalanyp, jansaqtaý bólimine jatqyzylǵan. Ol 80-90% termııalyq kúıik alǵan.

Emdelgenine qaramastan, naýqas qaıtys boldy. Jarylys bolǵan páterdi otbasy memlekettik baǵdarlama boıynsha alǵan. Marqum pedıatrdyń artynda kúıeýi men eki balasy qaldy, jarylys kezinde olar úıde bolmaǵan.

Budan buryn Túrkistan oblysyndaǵy kóppáterli turǵyn úılerdiń birinde gaz jarylysy bolǵanyn jazǵan edik.