Túrkistan oblysynda bolǵan órt boıynsha qylmystyq is qozǵaldy

TÚRKІSTAN. KAZINFORM — Túrkistan oblysy Jetisaı aýdanynda bolǵan órt faktisi boıynsha «Órt qaýipsizdigi talaptaryn buzý» babymen qylmystyq is qozǵaldy.

— Qazirgi ýaqytta bolǵan oqıǵanyń barlyq mán-jaılaryn anyqtaýǵa baǵyttalǵan qajetti is-sharalar júrgizilip jatyr. Tergeý nátıjesimen protsestik sheshim qabyldanatyn bolady, — delingen Túrkistan oblysy Polıtsııa Departamenti taratqan resmı aqparatta.

Búgin tańerteń Jetisaı aýdanynyń Alǵabas aýylynda eki qabatty jeke turǵyn úı órtenip, 12 adam mert boldy. 

Oqıǵa ornyna órt sóndirýshiler jetkenge deıin turǵyn úı tolyqtaı órtke oranǵan.

Órtti barlaý jáne sóndirý barysynda úıdiń ishinen es-tússiz kúıdegi úsh adam evakýatsııalanyp, jedel medıtsınalyq járdem brıgadasyna tapsyryldy. Úıdiń ishinen toǵyz balany qosa alǵanda, barlyǵy 12 adamnyń denesi tabyldy.

Kórshilerdiń aıtýynsha, aldyńǵy kúni úı ıeleri is-shara ótkizgen, úıde qonaqtar bolǵan. Órt 360 sharshy metr aýmaqta tolyqtaı sóndirildi.

Oqıǵa ornynda barlyq jedel qyzmetter jumys istep jatyr. Órttiń shyǵý sebepteri belgisiz. Tergeý bastaldy.

Prezıdent Qasym-Jomart Toqaev Túrkistan oblysy Jetisaı aýdanyndaǵy jeke úıde bolǵan órttiń saldarynan kóptegen adamnyń qaza tabýyna baılanysty kóńil aıtty. 

Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, qaıǵyly oqıǵany jan-jaqty tekserýdi tapsyrdy.

Prezıdenttiń tapsyrmasy boıynsha Túrkistan oblysyndaǵy órtke baılanysty Úkimettik komıssııa qurylǵany anyqtaldy.