Túrkistan oblysynda bloger emhana basshysynan 1 mln teńge aqsha bopsalaǵan
TÚRKІSTAN. KAZINFORM — Keles aýdanynda polıtsııa qyzmetkerleri medıtsınalyq mekeme basshysynan aqsha bopsalady degen kúdikpen blogerdi qamaýǵa aldy.
Túrkistan oblysy Polıtsııa departamentiniń Uıymdasqan qylmysqa qarsy kúres basqarmasynyń qyzmetkerleri jedel-izdestirý is-sharalary barysynda aqsha qarajatyn bopsalaýǵa kúdikti 32 jastaǵy áıel blogerdi ustady.
Belgili bolǵandaı, kúdikke ilingen jergilikti turǵyn blog júrgizip, ózin qoǵam belsendisi retinde kórsetken.
— Aldyn ala málimetter boıynsha kúdikti Keles aýdanyndaǵy medıtsınalyq mekemeniń basshysynan áleýmettik jelilerde bedelin túsiretin sıpattaǵy materıaldardy taratpaǵany úshin 1 mıllıon teńge kóleminde aqshalaı syıaqy talap etken. Atalǵan fakti boıynsha qylmystyq is qozǵaldy. Zattaı dáleldemeler tárkilendi, — delingen oblystyq PD habarlamasynda.
Qazir oqıǵanyń barlyq mán-jaıyn anyqtaýǵa baǵyttalǵan sotqa deıingi tergeý amaldary júrgizilip jatyr.
Budan buryn Túrkistan oblysynda kásipkerdi bopsalaǵan bloger ustalǵanyn jazǵan edik.
